Լիլիթ Թադևոսյան

«Այսօր մեր ժողովրդի գրեթե 90 տոկոսը խորապես համոզված է, որ քվեարկողների ճնշող մեծամասնությունը «ոչ» է ասել այս սահմանադրություն կոչված խեղկատակությանը՝ հանրաքվեին»,- այսօր «Նոր Հայաստան» դաշինքի հրավիրած հանրահավաքում ունեցած իր ելույթում ասաց Հայ Ազգային Կոնգրեսի վարչության անդամ, ազատամարտիկ, նախկին քաղբանտարկյալ Վարդան Մալխասյանը:

Սակայն, «չարիքի իշխանությունը, գործի դնելով կեղծիքի ու բռնության իր մեքենան, ուղղակի թվերը շուռ է  տվել՝ 70 տոկոս «ոչ»-ը դարձնելով 70 տոկոս «այո», գողացել է ժողովրդի քվեն, ժողովրդից գողացել է նրա արժանապատվությունը, նրա ազատությունը, նրա հայրենիքը»: Ազատամարտիկի խոսքով՝ այս հանրաքվեն ատելությունը բազմապատիկ անգամ կրկնապատկեց: «Ամբողջ աշխարհում ապացուցված ու անհերքելի ճշմարտություն է, որ որևէ երկրի ժողովուրդ, երբ իր առաջնորդ հռչակվածներին ատում է խորապես, այդ երկիրը առաջընթաց ու զարգացում ունենալ չի կարող: Այնպես որ, մեր իշխանությունը բռնազավթածները լուրջ սպառնալիք են մեր ազգային անվտանգությանը»,- ասաց Վարդան Մալխասյանը:

Նա նշեց, որ բոլոր սանձարձակ կեղծիքները իշխանությունը կատարեց իր «լակեյների, կամակատարների, կատարածուների ու գողականների միջոցով, քանի որ նրանք են իր հենարանը, և առանց նրանց իշխանությունը մեկ ժամ չի կարող գոյատևել:

«Եվ այդ լակեյները հասկացել են, որ իշխանությունն ունի հետևյալ բանաձևը. որպեսզի ձեռք բերես բարիքը, պիտի ընդունես ստորությունը: Սնունդ՝ պղծության դիմաց. այս է նրանց մոտեցումը: Եվ նրանք պղծվելով՝ կատարեցին այդ ծանր հանցագարծությունը մեր ժողովրդի նկատմամբ: Իզուր չի ասված, որ ողորմելի տականքը մեկ սպասավոր ունենալու համար պատրաստ է ծառայել ոչ միայն տասնյակ, այլ հարյուրավոր տերերի»,- ասաց Վարդան Մալխասյանը:

Ըստ նրա՝ այս ամենից հետո մեկ սանտիմետր նահանջելու տեղ չի մնացել, և բոլորը պետք է լավ հասկանան, որ բռնատիրական ռեժիմի դեմ պայքարը բոլոր առումներով ազգային ազատագրական է, ու յուրաքանչյուր մարդ պետք է դառնա այդ պայքարի նվիրյալն ու զինվորը: