Դեկտեմբերի 13-ից 15-ը ՀՀ առողջապահության նախարար Արմեն Մուրադյանը, Իրանի Իսլամական Հանրապետության առողջապահության և բժշկական կրթության նախարար Սեյեդ Հասան Հաշեմիի հրավերով, այցելել է Թեհրան: Այս մասին տեղեկացնում է արտաքին գործերի նախարարությունը:

Դեկտեմբերի 14-ին կայացել  է նախարարներ Ա.Մուրադյանի և Ս.Հաշեմիի հանդիպումը, որին ներկա է եղել նաև Իրանում ՀՀ դեսպան Արտաշես Թումանյանը: Հանդիպման ընթացքում քննարկվել են երկկողմ համագործակցությանը վերաբերող մի շարք հարցեր: Արդյունքում կողմերը ստորագրել են առողջապահական ոլորտում համագործակցության վերաբերյալ փոխըմբռնման հուշագիր:

Այցի շրջանակներում Արմեն Մուրադյանը եղել է Թեհրանի «Noor» ակնաբուժական կենտրոնում, ինչպես նաև «Aryogen» դեղագործական և արտադրական ընկերությունում:

Հանդիպումների ընթացքում քննարկվել են առողջապահության ոլորտին առնչվող գիտահետազոտական, կրթական և արտադրական համագործակցության ծրագրեր:

Նախարար Մուրադյանը հանդիպել է նաև Իրանի հայ համայնքի ներկայացուցիչների հետ, որի ընթացքում ներկայացրել է ՀՀ առողջապահության ոլորտի վիճակը և կառավարության առաջիկա ծրագրերը: