Լիլիթ Թադևոսյան
Այսօր ԱԺ-ում Վերահսկիչ պալատի նախագահ Իշխան Զաքարյանը ներկայացրեց ՎՊ 2016 թվականի գործունեության տարեկան նախագիծը:
Նա ասաց, որ ծրագրի մեջ իրենք մի շատ կարևոր սկզբունք են ամրագրել, և դա այն է, որ բոլոր ոլորտները, որը ՎՊ խոհուրդը նպատակահարմար է գտել վերահսկողություն իրականցնելու, կոնկրետ գրված են ըստ ծրագրերի:
«Այսինքն՝ առաջին անգամ կարող ենք ասել, որ մենք ներկայացրել ենք 100 տոկոսանոց ըստ ծրագրերի վերահսկողության բոլոր թեմաները: Այդ առումով ԿԳ նախարարության, Տրանսպորտի և կապի նախարարության, Պաշտպանության նախարարության, Ոստիկանության համակարգի, Տնտեսական մրցակցության պաշտպանության պետական հանձնաժողովի, Անշարժ գույքի Կադաստրի պետական կոմիտեի, Գյուղատնտեսության նախարարության և Սոցիալական ծառայության տարածքային գործակալությունների կողմից իրականացվող բոլոր ծրագրերը: Ընդհանուր առմամբ 11 ծրագրեր են, 10-րդ կետը վերաբերում է օտարերկրյա պետությունների միջազգային ֆինանսական կազմակերպությունների կողմից կառավարությանը տրամադրված վարկային և դրամաշնորհային ծրագրերի միջոցների օգտագործմանը:
Այստեղ բնականաբար մենք վերահսկողության դաշտում պահելու ենք այն թեմաները, որոնք նախորդ տարիներին չեն ստուգվել կամ վեահսկողության դաշտում չեն եղել կամ ենթադրենք դրանք շարունակական ծրագրեր են»,- ասաց Իշխան Զաքարյանը:
Երբ հերթը հասավ պատգամավորների հարցեր տալուն, ՕԵԿ խմբակցության ղեկավար Հեղինե Բիշարյանը մի քանի հարց ուղղեց Զաքարյանի:
Նրա առաջին հարցը վերաբերում է կրթական համակարգին: Մասնավորապես, նա նշեց, ծրագրում նշված է, որ Շենգավիթի 18 դպրոցների վերանորոգման աշխատանքները տարիներ շարունակ չեն ավարտվում:
«Ի՞նչ եք կարծում, ինչպիսի՞ գործիքներ պետք է կիրառել, որ այդ դպրոցների շինարարական աշխատանքներն ավարտվեն, որովհետև մեր սուղ պայմաններից, նույնիսկ այսօր վարկերի միջոցով մենք փորձեցինք գումարներ տրամադրել, որ կարողանանք դպրոցները սեյսմակայուն դարձնենք, վերանորոգենք և այլն: Ինչպիսի՞ գործիքներ եք կիրառել և ինչ ժամկետներ են սահմանվել»,- հացրեց Բիշարյանը:
Այնուհետև նա հարցրեց շաքարային դիաբետի հետ կապված ինսուլին դեղատեսակի մասին՝ նշելով, որ մասին, որ եթե դեղերի ավելցուկ կա և ժամանակին ստացվել է և շատ է, բայց Վանաձորում, երբ ինքը հանդիպել է քաղաքացիների հետ, իրեն հայտնել են, որ դիմում են պոլիկլինիկաներին, բայց այնտեղ ասում են, որ արդեն ինսուլին չկա վերջացել է, և սա այն պարագայում, երբ բոլորը գիտեն, որ նման հիվանդներին ինսուլինը տալիս են անհատույց:
«Նրանք հարցնում են, ինչպես ձեռք բերենք, և ինչո՞ւ դեռ տարին չավարտած մեր դեղերի չափերն արդեն սահմանափակվել են: Այդտեղ, եթե կան խախտումներ, կխնդրեի որոշակի ինֆորմացիա տալ»,- ասաց Հեղինե Բիշարյանը:
Նրա երրորդ հարցը վերաբերում էր Գեղարքունիքի մարզի 6-րդ մանկապարտեզին: Նա նշեց, որ վաղուց արդեն օրենքով ամրագրված է, որ մանակապարտեզի շենքերը օտարման ենթակա չեն, և հնարավոր է միայն Կառավարության որոշումով այն դեպքում, եթե դարձյալ այդ համակարագին է ծառայելու: Սակայն Բիշարյանը մատնանշեց, որ այստեղ կար դեպք, որ մասնավոր ՍՊԸ-ն դա ներկայացրել է մասնավորեցման:
Իշխան Զաքարյանը սկսեց պատասխանել վերջին հարցից և ասաց, որ դեռևս ուժի մեջ է այն դրույթը, որ ընդհանրապես հիմնական հաստատությունները, եթե մասնավորեցվում են՝ միայն դեպքում, երբ որ մասնավորեցնող ընկերությունը ծառայեցնում է դրանք ուսումնական նպատակների համար:
«Եվ այս առումով մենք շատ հստակ մեր մոտեցումներն ունենք և մեր բոլոր հաշվետվությունների մեջ, եթե կան նմանատիպ դեպքեր, սրա մասին արձանագրում և գրում ենք: Այստեղ երկրորդ կարծիք չկա և երկրորդ մոտեցում չկա: Ինսուլինի և դեղերի բաշխվածության մասով, դուք հիմա հարց եք բարձրացնում հասցեականության մասին:
Ես ձեզ ասեմ, որ հասցեականության խնդիրը չի նայվել, դա մեր օրակարգում է եղել այս տարի, դուք, կարծում եմ, հնարավություն կունենաք 2015 թվականի հաշվետվության մասով սրա մասին ավելի լիարժեք լսելու կամ ծանոթանալու մեր ներկայացրած տեսակետներին: Եվ դպրոցների վերանորգման հետ կապված աշխատանքները ձեզ ասեմ, որ այստեղ խնդիրը 18 կամ ավելի դպրոցների մասին չի, սրանք ավելի մեծ թվով դպրոցներ են: Դրանց մասին մենք մի քանի տարի խոսել ենք, և կարծում եմ, որ այն խնդիրները, որ մենք բարձրաձայնել էինք ժամանակին՝ դրանք բավականին շատ հաշվի են առնվել Կառավարության կողմից և հիմա գնում են դեպի դրանց վերջնական աշխատանքների ավարտին»,- ասաց Իշխան Զաքարյանը՝ հավելելով, որ խոսքը վերաբերում է նրան, որ տարիներ շարունակ, իրենք փոքր-փոքր գումարներ են դնում և դրանք հետագայում փորձում են ավելացնել: