Գայանե Սարգսյան

«Եթե մենք պատրաստ լինենք առաջարկել լուծումներ աշխարհի բիզնեսներին, ապա նրանք Հայաստանին կնայեն ոչ թե որպես երկիր, որտեղ պետք է բարերարություն անել, այլ որպես երկիր, որտեղ կարող են գտնել ամենաամբիցիոզ լուծումները՝ իրենց բիզնեսների համար»:

Շուրջ 5 ամիս է` Գյումրու ու Վանաձորի տեխնոլոգիական կենտրոններում ընթացքի մեջ են Ձեռնարկությունների ինկուբատոր հիմնադրամի կողմից կազմակերպված ծրագրավորման ու բարձր տեխնոլոգիաների ոլորտի դասընթացները (վեբ ծրագրավորում, մոբայլ ծրագրավորում, համակարգչային ճարտարագիտություն):

 Ներկայումս անվճար հիմունքներով իրականացվող դասընթացներին Գյումրիում մասնակցում է 205, Վանաձորում ՝ 160 մարդ: Ձեռնարկությունների ինկուբատոր հիմնադրամի տնօրեն Բագրատ Ենգիբարյանը սա լուրջ ցուցանիշ է համարում:

«Ամիսներ առաջ քննարկում էինք՝ արդյո՞ք կկարողանանք  ամսական 10-20 մասնագետ պատրաստել: Այսօր խոսքը վերաբերում է ամեն քաղաքում շուրջ 200 մարդու մասին, և սա միայն սկիզբն է,- ասում է նա ու վստահեցնում,- 2016թ. հուլիսին մենք կունենանք 1000-ական մասնագետ Գյումրիում ու Վանաձորում»:

Անդրադառնալով իրականացվող ծրագրի հեռահար նպատակներին՝ Բ. Ենգիբարյանը մատնանշում է Հայաստանը տարածաշրջանում տեխնոլոգիական միջավայր դարձնելու գաղափարը, երբ Հայաստանն աշխարհին ցույց կտա ոչ միայն տեղեկատվական տեխնոլոգիաների, այլ բարձր տեխնոլոգիաների ոլորտի   լուծումներ ու մշակումներ:

Որպես ծրագրի իրականացման հաջող օրինակ ՁԻՀ-ի տնօրենը բերում է մեկուկես տարի առաջ բացված Գյումրու տեխնոլոգիական կենտրոնի օրինակը.

«Կենտրոնում այսօր ընդհանրապես տեղ չկա: Դա մի միջավայր է, որտեղ ունենք նորաստեղծ ու գործող կազմակերպությունններ: Մի բան մեզ հաջողվեց, որը, ես կարծում եմ, ամենակարևորն էր: Կարողացանք կազմակերպություններ ձևավորել ոչ միայն Գյումրիից, այլեւ  Երևանից ու արտասահմանից բիզնեսներ տեղափոխվեցին Գյումրի՝ աշխատանքի վերցնելով տեղացիներին»:

Ծրագրի շարունակականությունն ապահովելու համար  ՁԻՀ-ում երկու մարտահրավեր են կարևորում՝ կադրերի ու վերապատրաստող մասնագետների շարունակականության ապահովումը:

Այսօր՝  ծրագրավորման դասընթացներից շուրջ 5 ամիս անց, Գյումրու ու Վանաձորի սովորողները գրանցում են առաջին հաջողությունները, նրանցով արդեն հետաքրքրվում են երևանյան կազմակերպությունները.

«Մարդիկ արդեն սովորելու ընթացքում պահանջարկ ունեն և շատ կազմակերպություններ, հատկապես Երևանից, արդեն հարցազրույցներ են սկսել, որպեսզի որոշակի մակարդակի հասնելուց հետո իրենց մոտ աշխատանքի վերցնեն»,- ասում է Բ. Ենգիբարյանը:

Դասընթացների առաջին փուլը Վանաձորում դեռ չի ավարտվել, սակայն ինչպես Վանաձորի տեխնոլոգիական կենտրոնի կրթական բաժնի ղեկավար Նելսոն Մամուլյանն է վստահեցնում, արդեն իսկ 100-ից ավել նոր հերթագրվածներ կան հաջորդ փուլին մասնակցելու համար: Գրանցվածների թվում նաև Ռուսաստանի Դաշնությունում ապրող հայեր են:

Վանաձորում հետաքրքրվողների տարիքային տատանումները մեծ են.

«Նույնիսկ դպրոցականներ են գալիս, որոնց 17-ը դեռ չի բոլորել, ունենք նաև  50-նն անց տարիքի սովորողներ»,- նշում է Ն. Մամուլյանը:

Պատասխանատուների հավաստմամբ՝ դասընթացների ձևաչափը Վանաձորում դինամիկ փոփոխությունների է ենթարկվում՝ ելնելով աշխատաշուկայի ու ուսանողների պահանջներից:

«Սա  մի հերթական ուսումնական պրոցես չէ, այլ ուղղված է ելքին: Մենք մեր հայացքն ուղղում ենք ելքին, որտեղ սպասելու ենք բարձրորակ մասնագետների, ովքեր այսօրվա ՏՏ ոլորտի պահանջներին պետք է բավարարեն»,- ասում է Վանաձորի տեխնոլոգիական կենտրոնի կրթական բաժնի ղեկավարը:

Գյումրու տեղեկատվական տեխնոլոգիաների կենտրոնի ղեկավար Ամալյա Եղոյանն էլ վստահ է. «Եթե մենք պատրաստ լինենք առաջարկել լուծումներ աշխարհի բիզնեսներին, ապա նրանք Հայաստանին կնայեն ոչ թե որպես երկիր, որտեղ պետք է բարերարություն անել, այլ որպես երկիր, որտեղ կարող են գտնել ամենաամբիցիոզ լուծումները՝ իրենց բիզնեսների համար»: