Փ. Բուզանդ փողոցի պետական կարիքների համար քանդված տների մոտ տասը բնակիչներ, ովքեր հրաժարվել են կնքել իրենց տների վաճառքի պայմանագրեր եւ դուրս գալ հաշվառումից (գրանցում), այսօր զրկվել են ընտրություններին մասնակցելու իրավունքից:

ՀՀ Ընտրական օրենսգիրքն ասում է, որ ընտրելու իրավունք ունեն միայն 18 տարին լրացած, հաշվառված եւ փաստացի բնակվող ՀՀ քաղաքացիները: Սակայն, այս մարդիկ այսօր ոչ մի տեղ հաշվառված չեն, ավելին` նրանց հանել են հաշվառումից առանց տեղյակ պահելու:

2005 թվականին Վճռաբեկ դատարանը որոշում է չնչին փոխհատուցմամբ դադարեցնել Փ. Բուզանդ փողոցում բնակվող մարդկանց սեփականության իրավունքն իրենց տների նկատմամբ, դրանք վերցնել պետության կարիքների համար եւ բնակիչներին վտարել տներից: Հետագայում Սահմանադրական դատարանը (630 որոշմամբ) հակասահմանադրական ճանաչեց այս որոշումները եւ ժամանակ տվեց կառավարությանը մինչեւ 2006թ.-ի հոկտեմբերի 1-ը հարցին լուծում տալ, բայց, միեւնույն է, ոչինչ չփոխվեց:

Կենտրոն ոստիկանության անձնագրային ծառայության աշխատակից Անահիտը հավաստիացրեց, որ ոչ ոքի հաշվառումից չեն հանում առանց իր համաձայնության, բայց գործնականում ամեն ինչ այլ կերպ է:

Փ. Բուզանդի նախկին բնակիչ Հովհաննիսյան Աստղիկի ընտանիքը հրաժարվել է 14.000 դոլարով վաճառել իրենց տունը: «Գրանցումից մեզ հանել են առանց մեզ տեղեկացնելու, բայց մենք տան վաճառքի պայմանագիր չենք կնքել եւ հաշվառումից դուրս չենք եկել: Քանի որ անձնագրիս ժամկետը լրանում էր, ես որոշեցի երկարացնել, բայց անձնագրային վարչությունում ասացին, որ ես եւ իմ ընտանիքի 5 անդամները ոչ մի տեղ հաշվառված չենք եւ այսպես կանգնեցինք փաստի առջեւ` զրկվելով ոչ միայն տնից, այլ նաեւ քաղաքացիական այլ իրավունքներից, այդ թվում նաեւ ընտրելու իրավունքից: Մեր ընտանիքից 4 հոգի չափահաս են, բայց, փաստորեն, չենք կարող ընտրել»,- ասում է Աստղիկ Հովհաննիսյանը:

Ընտրական օրենսգիրքը սահմանում է, որ ընտրելու իրավունք ունեցող եւ հաշվառում չունեցող քաղաքացիները քվեարկության օրվանից մինչեւ 21 օր առաջ կենտրոնական ընտրական հանձնաժողովի սահմանած կարգով ներկայացնում են ընտրողների ցուցակում ընդգրկվելու վերաբերյալ հայտ: Հաշվառում չունեցող քաղաքացիներն ընտրողների ցուցակներում ընդգրկվում են բնակության վայրի մասին տեղեկանքի հիման վրա:

«Ընտրատեղամասի պատին գրված էր, որ եթե ինձ չեմ գտնում ցուցակում, կարող եմ դիմում գրել, ընթացք տալ, դատական կարգով հարցը լուծել եւ այլն, եւ այլն: Բայց ինչո՞ւ համար ես հիմա դա անեմ, փաստը մնում է փաստ, որ ինձ զրկել են այդ իրավունքից, դա չի եղել իմ գործողությունների հետեւանքով, որ հիմա քայլեր ձեռնարկեմ իմ ընտրելու իրավունքը վերականգնելու համար: Ընտրացուցակներում հասցեները սկսվում են Ե. Կողբացու 4-ից եւ անմիջապես անցնում Ե. Կողբացի 29-ին, 28-ը դուրս է եկել, մենք չկանք ոչ մի տեղ: Մեր ընտանիքի 7 չափահաս անդամները չեն մասնակցելու ընտրություններին: Աղջիկս այս տարի առաջին անգամ պետք է մասնակցեր ընտրություններին»,- ասում է Ե. Կողբացու 28, բն. 22 հասցեի նախկին բնակիչ Նաիրա Վարդանյանը:

«Ես անձամբ Կենտրոնի ընտրացուցակներում բազմաթիվ խախտումներ եմ արձանագրել. պարզվում է` ցուցակներից դուրս են մնացել Փ. Բուզանդ փողոցի 15 բակի 6 բնակիչներ, 23 եւ 17 բակերից` 2 մարդ: Նույն պատկերն է նաեւ 9/16 եւ 9/18 տեղամասերում, սակայն այս մարդիկ հաշվառումից դուրս չեն եկել,- ասում է «Պետական կարիքների զոհեր» ՀԿ նախագահ Սեդրակ Բաղդասարյանը:-Եւ հարցը միայն այս ընտրություններին մասնակցելը չէ, մենք շատ ուրիշ իրավունքներից ենք զրկվում, մենք չենք կարող անձնագրի ժամեկտն ավելացնել, հանրապետությունից դուրս գալ, ինչո՞ւ չէ` նաեւ ընտրվել»:

Աշոտ Պողոսյանին ՀՀ ոստիկանության անձնագրային եւ վիզաների վարչությունը ծանուցում է ուղարկել իրեն եւ հարսին հաշվառումից հանելու մասին. «Դուք եւ ձեր հարսը` Սյուզաննա Կաբաջյանը, հանվել եք Երեւանի Բուզանդ փող. 15 շենքի թիվ 10 բնակարանի հաշվառումից»: Թոշակ ստանալու համար Աշոտ Պողոսյանը գրանցվել է Մասիսում ապրող մի բարեկամի տանը, սակայն նրա ընտանիքի երեք չափահաս անդամները շարունակում են «օդից կախված մնալ»:

Նորանշանակ վարչապետ Սերժ Սարգսյանն այս մարդկանց խոստացել է լուծում տալ իրենց հարցին, այն է` վերականգնել նրանց իրավունքները համարժեք փոխհատուցմամբ: «Համենայն դեպս, ի տարբերություն ուրիշ պաշտոնյաների, նա ընդունել եւ լսել է մեզ, խոստացել, որ կաջակցի»,- ասում է նախկին գնդապետ Աշոտ Պողոսյանը:

«Վարչապետին չհավատալու պատճառ չունեմ, նա գոնե մեր ներկայացուցիչներին ընդունել է, բայց հենց այն խոսքը, որ թող մնա ընտրություններից հետո, արդեն մի քիչ զգաստացնում է մեզ...»,- ասում է Նաիրա Վարդանյանը: