Հայաստանի օգտակար հանածոների հանքավայրերի պետական հաշվեկշռում հաշվառված են օբսիդիանի չորս հանքավայրեր, որոնք գտնվում են Դամլիկի, Արտենիի, Արթին լեռի և Արթին լեռի Սևքարի տեղամասերում: Այդ հանքավայրերը ներկայումս չեն շահագործվում: ՀՀ կառավարությունը Ազգային ժողով է ներկայացրել «Պետական տուրքի մասին»  ՀՀ օրենքում լրացումներ կատարելու մասին նախագիծ, որով  նպատակ է հետապնդում խթանել ոչ մետաղական հանքարդյունաբերության ոլորտը, մասնավորապես՝ օբսիդիանի հանքավայրերի շահագործումը:

Կառավարությունն առաջարկում է օբսիդիանի յուրաքանչյուր հանքավայրի շահագործման թույլտվության տրամադրման համար տարեկան պետական տուրք սահմանել 100 հազար դրամի չափով: Գործող օրենքով գունագեղ քարերի յուրաքանչյուր հանքավայրի շահագործման թույլտվության տարեկան տուրքը կազմում է 10 մլն դրամ:

Նախագծի հեղինակները նշում են, որ թեև ավելի քան  20 տարի հայկական օբսիդիանի բնական գունագեղ քարերն օգտագործվում են հուշանվերների և շինանյութերի արտադրության բնագավառներում, սակայն օբսիդիանի հումքի օգտագործման ծավալները Հայաստանում շատ մեծ չեն՝ տարեկան 3500-5000 տոննա:

Ներկայումս գործող պետական տուրքի 10 մլն դրամ դրույքաչափի  պայմաններում օբսիդիանի հանքի շահագործումը տնտեսապես դառնում է ոչ շահավետ և տեղական ընկերությունները բարդությունների առջև են կանգնում օբսիդիանի հանքաքարի օրինական` փաստաթղթավորված կերպով ձեռք բերելու հարցում, քանի որ օրինական գրանցված և աշխատող օբսիդիանի հանքավայրեր Հայաստանում չկան: Իսկ օբսիդիանի արտադրանքի մեծ մասն արտահանվում է` ապահովելով համապատասխան մուտքեր պետական բյուջե:

Օբսիդիանի հանքաքար օգտագործող ընկերությունների և պետական մարմինների ներկայացուցիչների մասնակցությամբ էկոնոմիկայի նախարարությունում կայացել է քննարկում, ինչի արդյունքում անհրաժեշտություն է առաջացել «Պետական տուրքի մասին» ՀՀ օրենքով նվազեցնել օբսիդիանի հանքավայրի շահագործման համար սահմանված պետական տուրքի դրույքաչափը: