Երևանի ավագանու «Բարև Երևան» խմբակցության անդամ Անահիտ Բախշյան բաց նամակով դիմել է քաղաքապետ Տարոն Մարգարյանին մի շարք դպրոցների տնօրենների վերաբերյալ փաստեր հրապարակելու պահանջով: Ստորեւ՝ նամակն ամբողջությամբ:

«Ձեր 16.12.2015թ, N814-Ա կարգադրության համաձայն, հիմք ընդունելով Երևանի քաղաքապետարանի աշխատակազմի հանրակրթության վարչության առաջարկությունը, 2015թ. դեկտեմբերի 16-ից մինչև 23-ը Երևանի քաղաքապետարանի ենթակայության h.147 դպրոցում առկա բողոքների հիմքերով ուսումնասիրություն կատարելու համար ստեղծվել է աշխատանքային խումբ, որի ղեկավարն եք նշանակել Երևանի քաղաքապետարանի աշխատակազմի կրթության վարչության պետ Գայանե Սողոմոնյանին, կազմում՝ վերահսկողության վարչության պետ՝ Արմեն Սիմոնյանը:

Խնդրում եմ  տրամադրել անհրաժեշտ  տեղեկատվություն այն մասին, թե.

• Ի՞նչ  արդյունք ունեցավ վերահսկողության ուսումնասիրությունը  թ. 147 դպրոցում, ո՞ւմ կողմից  են եղել բողոքները և ինչի՞  վերաբերյալ:
• Տրամադրել  աշխատանքային խմբի  ուսումնասիրության  արձանագրությունը:

Ձեր մեկ այլ կարգադրությամբ՝  04.03.2015թ. N179-Ա, ժամանակավորապես դադարեցվել է Երևանի թ. 64 դպրոցի տնօրեն Անաիդա Շահնազարյանի պաշտոնավարումը՝ համաձայն ՔրՕր-ի 152-րդ հոդվածի 2-րդ մասի՝ «Կասկածյալի պաշտոնավարումը ժամանակավորապես դադարեցնելու մասին»:

• Ի՞նչ  ընթացք  ունի  թ. 64  դպրոցի նախկին տնօրենի  նկատմամբ  հարուցված քրեական գործը, և ինչի՞ մեջ է նա  կասկածվում:
• Ավարտվե՞լ է, արդյոք, դատական պրոցեսը և ինչպե՞ս:
• Ե՞րբ է այս տնօրենի հետ խզվել աշխատանքային պայմանագիրն ու ի՞նչ հիմքով:

Ինչո՞ւ չեք  հրապարակայնացնում այս  փաստերը»: