Թիվ 40 ընտրատարածքի Իջեւանի շրջանի Դիտավան գյուղում առավոտյան քվեարկել են հարակից շրջանի զինվորները եւ, բնականաբար, ՀՀԿ-ի օգտին, եւ այդ շրջանում արդեն ավարտվել են քվեաթերթիկները:

Գյուղացիների մեծամասնությունը չի կարողանում քվեարկել: Հրահանգը իջեցված է քվեարկել Միքայել Վարդանյանի եւ ՀՀԿ-ի օգտին: Այս մասին են ահազանգում Գրողների միության նախագահ Լեւոն Անանյանի վստահված անձինք:

Երեկ լույս է տեսել «Դե ֆակտո» ամսագիրը, որտեղ հրապարակվել են կանխակալ եւ ստահոդ սոցհարցումներ: Այսպես` ՀՀԿ-ին, ըստ վայ սոցիոլոգների հարցումների, տրվելու է ձայների 74 տոկոսը: Թեեւ սոցիոլոգիական հարցումը ստահոդ է, սակայն խնդիրն այն է, որ Ընտրական օրենսգրքի համաձայն ընտրություններից մեկ օր առաջ նման սոցհարցում հրապարակելը օրենքի կոպիտ խախտում է: Այս մասին ՍԴ Հնչակյան կուսակցության մամլո դիվանին է հայտնել «Օրենքի ուժ» հ/կ-ի ղեկավար Նարեկ Մալյանը:

1. Թալինի շրջանի Արեգ գյուղում համատարած ընտրակաշառքներ են բաժանում ՀՅԴ, Դաշինք կուսակցությունների ներկայացուցիչները: Իրավիճակն այն աստիճան է լկտիացել, որ ստիպում են բացահայտ քվեարկել հօգուտ այդ կուսակցությունների:

2. 2/35 ընտրատարածքում փորձել են այսպես կոչված «կարուսել» աշխատացնել: Քվեարկողներից մեկը մտել է ընտրատեղամաս, վերցրել 2 քվեաթերթիկները եւ արկղի մեջ նետել միայն մեծամասնականինը: Այնուհետեւ պահանջել է իրեն տրամադրել նաեւ համամասնական քվեաթերթիկ, ինչը, սակայն, վստահված անձանց աղմուկից հետո չի տրամադրվել:

3. 4/07 ընտրատեղամասում սպասարկում է միայն մեկ սեղան, ինչը, բնականաբար, մեծ հերթեր է գոյացնում: Չի պահպանվում գաղտնիության սկզբունքը:

4. 2/26 ընրատեղամասում կրկնակի քվեարկության դեպք է գրանցվել, սակայն արձանագրվել է հանձնաժողովի կողմից:

5. Գյումրի քաղաքում Սամվել Բալասանյանի մարդիկ մինչեւ 20 000 դրամ գումար են բաժանում այն պայմանով, որ մեծամասնական ընտրակարգում ընտրեն Սամվել Բալասանյանին:

Հսկայական օրինախախտումներ են կատարվում Տավուշի մարզում: Ինչպես հեռախոսով ՍԴՀԿ մամլո դիվանին փոխանցեց Գրողների միության նախագահ եւ մեծամասնական թեկնածու Լեւոն Անանյանը, Շնող գյուղում որպես դիտորդ է գրանցվել համայնքապետ Հայկազուն Քոչինյանը եւ ուղղորդում, ինչպես նաեւ ընտրակաշառք է բաժանում, որպեսզի գյուղացիները քվեարկեն հօգուտ Միքայել Վարդանյանի: Ընտրակաշառքների դեպքեր են գրանցվել Հաղթանակ, Գետահովիտ եւ Այրում գյուղերում: Մարզպետը ստիպում է քվեարկել հօգուտ ՀՀԿ-ի:

Թիվ 5 ընտրատարածքի 33 ընտրատեղամասերում ՀՀԿ-ն աջակցում է Լեւոն Սարգսյանին: Ընտրատեղամասերի դիմաց կանգնած են երիտասարդներ, ովքեր ընտրատեղամաս մտնողներին հրահանգում են քվեարկել հօգուտ Լեւոն Սարգսյանի: 5-30 ընտրատեղամասում կրկնակի քվեարկության դեպք է արձանագրվել: Հանձնաժողովի անդամները այս պահի դրությամբ հրաժարվում են որեւէ արձանագրություն կազմել: 5/9 ընտրատարածքում հանձնաժողովի ՀՀԿ ներկայացուցիչ Ալլա անունով մի կին խանգարում է ՍԴ. Հնչակյան կուսակցության, «Ժառանգություն» կուսակցության եւ մեծամասնական ընտրակարգով առաջադրված Թաթուլ Մանասերյանի վստահված անձանց աշխատանքներին: Նույնիսկ հրավիրել են ոստիկանություն, որպեսզի վստահված անձանց դուրս հանեն:

3/27 ընտրատարածքում պոկվել է արձանագրություններ կատարվող մատյանի մեկ էջը: 4 անգամ էջը սոսնձել եւ նորից պոկել են: Հանձնաժողովը, չնայած ՍԴ Հնչակյան կուսակցության վստահված անձ Ռուզան Հարությունյանի բողոքին, հրաժարվել է արձանագրել այս իրադարձությունը:

2/34 ընտրատարածքում քվեաթերթիկի կապոցներից մեկում մնացել է 1 համամասնական ընտրակարգի համար նախատեսված քվեաթերթիկ եւ 3 մեծամասնական ընտրակարգի համար նախատեսված քվեաթերթիկ: 2 համամասնական ընտրակարգի համար նախատեսված քվեաթերթիկներն անհետացել են:

Ինչպես Վանաձորից ՍԴ Հնչակյան կուսակցության մամլո դիվանին է փոխանցել ՍԴՀԿ Վանաձորի շրջանի նախընտրական շտաբի պետ Ալեքսանդր Ալեքյանը, 30/9 ընտրատարածքի դիմաց կանգնած է մի ավտոմեքենա եւ ընտրակաշառք է բաժանում հօգուտ ՀՀԿ-ի:

30/25 ընտրատեղամասում այնքան միկրոավտոբուսներով ժողովուրդ են բերել, որ վիճակը դարձել է անկառավարելի: Վստահված անձինք չեն հասցնում հետեւել գործընթացին եւ կատարվում են օրինախախտումներ հօգուտ ՀՀԿ-ի:

2/34 ընտրատարածքի դիմաց ՄԱԿ-ի ներկայացուցիչները մինչեւ 20 000 դրամ ընտրակաշառք են բաժանում: Հենց նոր բախումներ են եղել ՄԱԿ-ի եւ հանձնաժողովի հանրապետական նախագահի միջեւ:

Հանրապետական կուսակցության ներկայացուցիչները գոհ չեն այս պահին ընտրողների թվից: Հնարավոր են լցոնումներ: