Տաթեւիկ Ղազարյան

Վանաձորում թեեւ տոներն ավարտվել են, սակայն «տոնական տրամադրությունը» վանաձորցիների համար դեռեւս շարունակվում է: Տերյան փողոցի կենտրոնում տեղադրված տոնածառն ու «տոնական խաղալիքները» թաղամասի բնակիչների ու վարորդների մտահաղացումն է: Սակայն մի քանի օր առաջ տեղադրված պոլիէթիլենային տոպարկներով ու պլասմասե շշերով զարդարված եղեւնին ոչ թե թաղամասը գեղեցկացնելու ու քաղաքին ամանօրյա շունչ հաղորդելու, այլ վթարներից հնարավորին չափ խուսափելու համար է: Դիտահորը, որի մեջ տեղադրված է տոնածառը, բաց է ավելի քան մեկ տարի:

 «Էս դիտահորը երթեւեկությանը շատ է խանգարում: Մի քանի օր առաջ վթար էր եղել էստեղ, որոշեցինք հիմա էլ տոնածառ դնենք: Բայց դե անծանոթ վարորդը խամություն ա անում, վթարի ենթարկվում կամ մեքենան է վնասում՝ հատկապես գիշերով: Նույնն վիճակում էլ բնակիչներն են: Մի անգամ տեսել եմ, որ բնակիչներից մեկն էլ էր ընկել մեջը»,- ասում է վարորդ Արսեն Մինասյանը:

Թաղամասի բնակիչ Լյովա Մացակյանն ասում է, որ Վանաձորի քաղաքապետարանի համապատասխան բաժինը փորձել է խնդրին լուծում տալ, սակայն հարցը մինչեւ վերջ այդպես էլ չի լուծվել: Իրենք էլ այս տարբերակն են ընտրել:

«Մոտ մի տարի կլինի՝ քաղաքապետարանից եկան, որ սարքեն, արմատուրներ գցեցին, քարեր դրին, ասֆալտ արին: Բայց կափարիչ չդրեցին, որ էլ չբացվի: Հետո, ծանր մեքենա գնաց ու էլի քանդվեց: Համապատասխան բաժիններին էլի ասել ենք, բայց ոչ մի օգուտ: Արդեն դիմելուց էլ ենք հոգնել: Շաբաթը մեկ մեքենա է ընկնում: Տոնածառը, ծառի ճյուղ կամ շիֆր ենք դնում: Եթե չդնենք, էրեխեքն էլ կընկնեն: Իմ տղան էլ է վարորդ, իմ ընկերն էլ, մենք էլ երեխաներ ունենք, բոլորս էլ ջանացավ ենք, վախենում ենք, որ մի վատ դեպք կպատահի«:

Տերյան փողոցի այս հատվածում ծառի ճյուղի առկայությունը պարտադիր պայման է: Յուրաքանչյուր եղանակ իր ծառն ունի: