Տաթեւիկ Ղազարյան

«Մինչեւ ստեղ նայել եմ (ձեռքով ցույց է տալիս պատին փակցված ցանկը), չեմ գտնում, պտի Կիրակոսյան Միշա ըլնի, բայց չկա: Մենք պապի ու տատի ենք, երկրաշարժից հետո մինչեւ հիմա ապրում ենք դոմիկում, ասի կարողա մեզ էլ հասնի, մեր բալերն էլ հերիքի: Մթամ խի՞ չեն սաղին տալիս, որ»:

Միշա պապին հանդիպեցի սոցիալական ապահովության Վանաձորի տարածքային բաժնում: Ինքն էլ շատերի պես փորձում էր իր անունը գտնել արդեն մի քանի օր առաջ սոցիալապես անապահով ընտանիքների` պատին փակցված այն ցանկում, որոնց կառավարության որոշման համաձայն` անվճար տրամադրվելու է DVB-T2 ստանդարտի թվային հեռուստատեսային ընդունիչ սարք:

Տեսնելով, որ չի կարողանում գտնել իր կամ կնոջ անունը` խնդրեց օգնել իրեն. «Բալա ջան կարող ա ես լավ չեմ տեսնում, մի հատ դու էլ նայի հա՞»: Փորձեցինք միասին փնտրել, սակայն ապարդյուն, Կիրակոսյան Միշա, ցանկում այդպես էլ չգտանք:

Միշա պապի պես տիկին Գայանեն էլ, ով սոցիալապես անապահով լինելուց բացի ունի երկրորդ կարգի հաշմանդամություն, ցանկում իր անունը չգտավ:

«Աղջիկ ջան, ասի գամ նայեմ, տենամ կա-չկա: Էդ էլ նայում եմ, տենամ չկա: Ումից հետաքրքրվեմ: Ասում են չի հասնում, շատ չգիտեմ, երեւի բալերս չի հերիքում: Գոնե բոլոր նպաստառուներին էլ տային»,- «Հետք»-ի հետ զրույցում սրտնեղած ասում է տիկին Գայանեն:

Մոտ 30 րոպե գտնվում էի սոցիալական ապահովության Վանաձորի տարածքային բաժնում: Շատ լոռեցիներ այդպես էլ իրենց կամ իրենց ընտանիքի անդամի անունը չգտան ցանկում:

Ի տարբերություն նախորդ զրուցակիցներիս` Թերեզայի ընտանիքի անապահովության միավորը սահմանված 34,6 միավորից բարձր է: Վերջինիս տրամադրվել է թվային ընդունիչ սարք ստանալու հնարավորություն. «Մեր անունը գտա ցանկում: Մեր բալերը հերիքում էր: Էդքան մեծ քանակությամբ օգնություն էլ չի, բայց դե ինչ-որ չափով օգնում են մարդկանց»:

Լոռու մարզում հաշվառված 20198 նպաստառու ընտանիքներից թվային սարքեր ստանալու հնարավորություն ունեն միայն 9709-ը: Վանաձոր քաղաքին տրամադրվել է 2693 թվային ընդունիչ սարք, Գուգարքի տարածաշրջանին՝ 552, Սպիտակի տարածաշրջանին՝ 2746, Ստեփանավանի տարածաշրջանին՝ 2330, Թումանյանի տարածաշրջանին՝ 889 եւ Տաշիրի տարածաշրջանին՝ 499 DVB-T2 ստանդարտի թվային հեռուստատեսային ընդունիչ սարք:

Հիշեցնենք, որ ՀՀ կառավարության 2015 թվականի դեկտեմբերի 24-ի թիվ 1532-Ն որոշումով` հաստատվեց սոցիալապես անապահով ընտանիքներին, որպես սոցիալական աջակցություն տրամադրել DVB-T2 ստանդարտի թվային հեռուստատեսային ընդունիչ սարք: Ընդունիչ սարքը տրամադրվում է այն ընտանիքներին, որոնք 2015 թվականի դեկտեմբերի 1-ի դրությամբ հաշվառված են ընտանիքների անապահովության գնահատման համակարգում եւ ունեն 34,6 եւ ավելի անապահովության միավոր: Ամբողջ հանրապետությունում սարքը կտրամադրվի 46,494 ընտանիքի: