Այսօր Երևանում հանրությանը ներկայացվեց անվտանգության ռազմաքաղաքական ասպեկտների վերաբերյալ ԵԱՀԿ վարքագծի կանոնագրքին նվիրված հոդվածների ժողովածուն, որում նաև ամփոփված են կանոնագրքի պատմությունն ու քաղաքական համատեքստը, կանոնագրքի իրականացման փորձը Հայաստանում և այլ երկրներում:

Ժողովածուն ներկայացնում է անվտանգության ոլորտի ժողովրդավարական վերահսկողության ամբողջական պատկերը ՀՀ պաշտպանության նախարարության Դրաստամատ Կանայանի անվան ազգային ռազմավարական հետազոտությունների ինստիտուտի, Մարդու իրավունքների պաշտպանի գրասենյակի, Երևանի պետական համալսարանի և այլ հաստատությունների փորձագետների տեսանկյունից: Ժողովածուն լույս է տեսել ԵԱՀԿ երևանյան գրասենյակի աջակցությամբ:

Անվտանգության ռազմաքաղաքական ասպեկտների վերաբերյալ ԵԱՀԿ վարքագծի կանոնագիրքը անվտանգության համաշխարհային մարտահրավերները լուծելու ԵԱՀԿ հիմնական մեխանիզմներից մեկն է: Այն ընդունվել է 1994թ. և շարունակում է մնալ եզակի փաստաթուղթ, որի նպատակն է կարգավորել զինված ուժերի դերը ժողովրդավարական հասարակություններում:

ԵԱՀԿ վարքագծի կանոնագիրքը ԵԱՀԿ մասնակից պետություններին նաև պարտավորեցնում է մշակել իրենց զինված ուժերի քաղաքացիական վերահսկողության համապարփակ մեխանիզմ' ներառյալ ռազմական, ռազմականացված և անվտանգության ուժերը, հետախուզական ծառայությունները և ոստիկանության համակարգերը:

«Առանց արդյունավետ ժողովրդավարական քաղաքացիական վերահսկողության և անվտանգության ոլորտի ինստիտուտների կառավարման՝ չի կարող լինել անվտանգության բնագավառում էական առաջընթաց»,- ասաց ԵԱՀԿ երևանյան գրասենյակի ռազմաքաղաքական ծրագրերի ղեկավար Լիլիան Շալառուն:

ՀՀ ՊՆ Դրաստամատ Կանայանի անվան ԱՌՀԻ-ի «Հայկական բանակ» ռազմագիտական հանդեսի գլխավոր խմբագրի տեղակալ Վարուժան Ավետիսյանը նշեց, որ ժողովածուն մշակելու գաղափարը ծագել է ԵԱՀԿ երևանյան գրասենյակի և Դ. Կանայանի անվան ԱՌՀԻ-ի գործնական շփումների ընթացքում:

«Ժողովածուի մեջ ներառված մշակումներում ժողովրդավարական արժեհամակարգի և ժամանակակից իրավական պարամետրերի տեսակետից վերլուծության և վերաիմաստավորման են ենթարկվում ՀՀ զինված ուժերի նկատմամբ ժողովրդավարական վերահսկողության, պաշտպանական ոլորտի կառավարման, ֆինանսական, տեղեկատվական և այլ համակարգերը, ներկայացվում են դրանց հայեցակարգային, օրենսդրական և կազմակերպական կատարելագործման վերաբերյալ համալիր առաջարկություններ»,- հավելեց Վարուժան Ավետիսյանը:

Ժողովածուի էլեկտրոնային տարբերակը տեղադրված է այստեղ: