2011 թ. աշնանային ծառատունկի շրջանակներում Երևանի վարչական շրջաններում կտնկվի 8000 դեկորատիվ ծառ, որոնցից 3000-ը թույա, 2000-ը սոսի, 1000 հացենի և 2000 դեկորատիվ թուփ: Այս խմբաքանակն, ըստ նախապես ներկայացված հայտերի, արդեն բաշխվել է վարչական շրջաններին:

2000 դեկորատիվ ծառ էլ, բացի վերոհիշյալ 8000-ից, ձեռք է բերվել Նոր Նորք վարչական շրջանի կողմից ու կտնկվի Նոր Նորքի այգիներում, պուրակներում և բակերում: Աշնանային ծառատունկի ընթացքում ևս 3000 ծառ կտնկվի Եռաբլուրի տարածքի բարեկարգման ծրագրով:

Ապրիլից սկսված՝ գարնանային ծառատունկի ընթացքում մայրաքաղաքում տնկվել են շուրջ 15300 տերևավոր և 17200 մշտադալար ծառ ու թուփ: Մշտադալարներն այս տարի մայրաքաղաք ներկրվեցին առաջին անգամ և բարենպաստ եղանակի շնորհիվ՝ տնկվեցին մինչև հուլիս: Մասնագետների վկայությամբ՝ կպչողականության ընդհանուր ցուցանիշը կազմել է 75 տոկոս:

Քաղաքապետի առաջին տեղակալ, քաղաքապետի պաշտոնակատար Տարոն Մարգարյանն այսօր այցելել է Էրեբունի վարչական շրջանի մանկական զբոսայգի, որտեղ մասնակցել է աշնանային ծառատունկին:

Երևանի քաղաքապետարանի տեղեկատվության և հասարակայնության հետ կապերի վարչության տեղեկացմամբ՝ ինչպես այս, այնպես էլ գարնանային ծառատունկը կազմակերպվել է բացառապես ոռոգելի տարածքներում:

Զրուցելով տարածքի բնակիչներ հետ՝ Տարոն Մարգարյանը նշել է, որ գարնանը այգու տարածքը ամբողջությամբ կբարեկարգվի, կկառուցվեն բաց և փակ զրուցարաններ, վնասված սալաքարերն էլ կփոխարինվեն ասֆալտե ծածկույթով: