«Պահպանենք Թռչկանը» նախաձեռնող խմբի մի քանի ակտիվիստներ շաբաթ օրն այցելել են Հրազդան քաղաք, որտեղ երկաթահանքերի հորատման աշխատանքներ են ընթանում: Նրանք փորձել են պարզել՝ ում է պատկանում հանքը շահագործելու իրավունքը, համապատասխան լիցենզիա կա՞ եւ այլն: Սակայն հանդիպել են այնտեղ աշխատող ռուս երկրաբանների անբարյացակամ վերաբերմունքին: Այս թեմայի շուրջ զրուցեցինք ակտիվիստ Մարիամ Սուխուդյանի հետ:

Մարիամ, ի՞նչ զգացիք, երբ ռուս երկրաբանները նախ փորձեցին արգելել տարածքում գտնվել, ապա նաեւ՝ ոստիկան հրավիրեցին:

Դե, մի տեսակ ոնց որ դու քո հողում, քո սարի վրա կանգնած ես, ու օտարը քեզ գալիս, ասում է՝ գիտե՞ս, իրավունք չունես այստեղ կանգնելու, դուրս արի այս տարածքից: Իսկ դու գնացել ես ընդամենը իրենց հարցնելու՝ ախպեր ջան, լիցենզիա ունե՞ս, խնդրում եմ բացատրիր՝ այս ի՞նչ աշխատանք ես այստեղ կատարում: Չնայած այս ամենին՝ մենք առաջնահերթ մեղադրում ենք մեր ներքին թուրքին, այսինքն՝ այն «հայերին», ովքեր տվել են այդ թույլտվությունը: Հետո երկրաբաններից մեկն ասաց՝ ես ոստիկանություն կկանչեմ, դու խանգարում ես ինձ: Երեւի 3 րոպե անց ոստիկանները եկան: Փորձեցին մեզ հրավիրել ոստիկանություն, ասացինք, որ մենք ոչ մի տեղ չենք գնալու, ոչ մի օրենք չենք խախտել: Այդպես բացատրեցինք, ոստիկանն էլ կարծես հասկացավ: Բայց իրականում մե՛նք պետք է կանչեինք ոստիկանություն, որ առանց թույլտվության մեկն եկել է, ինչ-որ աշխատանքներ է իրականացնում:

Իսկ դրանից հետո ձեզ հաջողվե՞ց պարզել՝ նախ թույլտվություն կա, թե չէ, եւ հետո՝ ով է իրականացնում այդ հանքի շահագործումը:

Գիտեք, նախաձեռնող խումբ է արդեն ձեւավորվում, «SOS Հրազդան» է կոչվում, մենք վաղը ուզում ենք հանդիպել ու այդ հարցերը քննարկել, որովհետեւ նոր-նոր է սկսվում այդ խնդիրը:

Իսկ ձեր կարծիքով՝ ի՞նչ վտանգ է ներկայացնում Հրազդանի երկաթահանքերի շահագործումը:

Դե, միայն իմ կարծիքով չէ… Երեւանի խմելու ջրի 40 տոկոսը գալիս է այդտեղից, որտեղ որ իրենք բաց եղանակով շահագործելու են: Արդեն իսկ Հրազդանում ցեմենտի գործարանից շատ մարդիկ տուժել են, շատ ծանր հետեւանքներ կան, ու ընդհանրապես, հրազդանցին դեմ է այդ պրոյեկտին, ու կարեւոր է այստեղ, որ իր կարծիքը հաշվի չեն առել: Մեզ ասացին, որ նաեւ բնակելի թաղամաս է ընդգրկված այդ պրոյեկտի մեջ, որը պետք է ենթադրի բնակչության տեղափոխություն: