Արդարադատության նախարար Արփինե Հովհաննիսյանի հանձնարարականով ՀՀ ԱՆ օրինականության վերահսկողության տեսչության աշխատակիցներն այցելել են «Նուբարաշեն» ՔԿՀ-ում պահվող Վարդգես Գասպարիին, լսել նրան: Այս մասին տեղեկացնում է նախարարությունը: Հանդիպման ընթացքում, ըստ հաղորդագրության, Գասպարին հայտնել է, որ իր բողոքը վերաբերում է խցակիցներին և ՔԿՀ աշխատակիցների նկատմամբ որևէ բողոք չունի:

Ներկայում, Վարդգես Գասպարիի բողոքի հիման վրա նյութեր են նախապատրաստվում՝ գլխավոր դատախազություն ուղարկելու նպատակով:

«Ինչ վերաբերում է նախօրեին Վարդգես Գասպարիի պաշտպանների հայտարարության հիման վրա նշանակված ուսումնասիրություններին, ապա դրանք ընթացքի մեջ են. արդյունքների վերաբերյալ համապատասխան հայտարարություն կտարածվի»,- հայտնում է նախարարությունը:

Ի գիտություն որոշ իրավապաշտպանների՝ նախարարությունը տեղեկացնում ենք նաև, որ   «Նուբարաշեն» ՔԿՀ-ում պահվող Վարդգես Գասպարին մինչև 24.02.2016 թ-ի (նախօրեի) ժամը 16:00-ն որևէ բողոք կամ դիմում չէր ներկայացրել քրեակատարողական հիմնարկի վարչակազմին՝ իր նկատմամբ խցակիցների կողմից կիրառված բռնության մասին. փետրվարի 23-ին ներկայացված դիմումը հացադուլ և ջրադուլ հայտարարելու մասին է եղել՝ այլ խուց տեղափոխվելու պահանջով, ինչը բավարարվել էր, որից հետո նա դադարեցրել էր հացադուլն ու ջրադուլը: