Ալավերդի քաղաքի «Սայաթ-Նովա» հրապարակում գտնվող  բաց մի դիտահոր   ամիսներ շարունակ մտահոգություն է դարձել հրապարակին հարող շենքերի բնակիչների համար:  Նոյեմբերի 15-ին  բնակիչները «Հետքին» դժգոհեցին, որ  դիտահորը փակելու մասին «Հայջրմուղկոյուղի» ՓԲԸ-ի հյուսիսարևելյան մասնաճյուղի Ալավերդու տեղամասին ուղղված իրենց բողոքները արդյունք չեն տվել:

Բնակիչները մասնավորապես անհանգստանում են երեխաների և տարեցների  անզգուշաբար  դիտահորն ընկնելու վտանգից. «Բանը լինելիս մի անգամ է լինում»,- ասաց թաղամասի մի բնակիչ, ով  ջրմուղկոյուղու Ալավերդու աշխատակիցների հետ անախորժություններից խուսափելու համար խնդրեց չհրապարակել իր անունը:

Դժբախտաբար  բաց  այս դիտահորը իր բոլոր վտանգներով եզակի չէ Ալավերդու թաղամասերում, որոնց կափարիչների տեղադրումը դուրս է մնում «Հայջրմուղկոյուղի» ՓԲԸ-ի  աշխատակիցների  ուշադրությունից: