Մարտի 25-ին և լույս 26-ի գիշերը ղարաբաղա-ադրբեջանական հակամարտ զորքերի շփման գծում ադրբեջանական կողմը տարբեր տրամաչափի հրաձգայինզինատեսակներից հայ դիրքապահների ուղղությամբ արձակել է ավելի քան 2500 կրակոց:

ԼՂՀ ՊՆ-ն հայտնում է, որ շփման գծի հյուսիսարևելյան ուղղությամբ ադրբեջանական զինուժը շարունակել է կիրառել նաև 60 (39 արկ) և 82 (34 արկ)  միլիմետրանոց ականանետեր, ՀԱՆ-17 (48 արկ)  ու ՌՊԳ-7 տիպի նռնականետեր (5 արկ):

Մարտի 26-ին՝ ժամը 07:30-07:40-ի սահմաններում հակառակորդը հրթիռահրետանային կայանքներից շփման գծի հարավարևելյան ուղղությամբ՝ 5 կմ խորությամբ, արձակել է 45 արկ: Արկակոծման հետևանքով վիրավորում է ստացել Թաղավարդ գյուղի բնակիչ, 1989թ. ծնված Երվանդ Կարոյի Ֆիրյանը*, ով զբաղվում էր գյուղատնտեսական աշխատանքներով:

Մանրամասները ճշտվում են:

«ՊԲ առաջապահ զորամասերի կողմից ձեռնարկված պատժիչ գործողությունների արդյունքում՝ հակառակորդի նախահարձակ ակտիվությունը ճնշվել է:

ԼՂՀ պաշտպանության նախարարությունը խստորեն դատապարտում է Ադրբեջանի կողմից իրադրության սրումը և հայտարարում, որ ստեղծված իրավիճակի հետևանքների ողջ պատասխանատվությունն ընկնում է հակառակորդ երկրի ռազմաքաղաքական ղեկավարության վրա»,- գրված է ԼՂՀ ՊՆ հաղորդագրության մեջ:

* Լուրի մեջ փոփոխություն է եղել․ Ֆիրյան ազգանունի փոխարեն ավելի վաղ հաղորդվել էր Փիրումյան ազգանունը, իսկ հրթիռահրետանային կայանքների փոխարեն՝  TR-107 տիպի զենիթահրթիռային կայանքներ։