Զինծառայողների հարազատները, չկարողանալով կապվել զինվորների հետ, ժամանում են Երևանի «Մուրացան» կենտրոնական զինվորական հոսպիտալ՝ պարզելու իրենց զինվորը վիրավո՞ր է, թե՞ ոչ:  Հարազատներից ոմանց թույլատրեցին մուտք գործել հոսպիտալ, ոմանք՝ ժամեր շարունակ սպասում էին, ոմանց էլ դեռ չեն պատասխանել՝ իրենց փնտրած զինվորը ներսու՞մ է, թե՞ ոչ։

Մատաղիսի զինծառայող 19-ամյա Վանիկ Հովսեփյանի եղբորը դպրոցի տնօրենն է տեղեկացրել, որ Վանիկը ուսից վիրավոր է: Նա էլ ժամանել  է հոսպիտալ վիրավորների ցուցակում եղբոր անունը փնտրելու համար: Եղբայրը կարծում է՝ դեպքը երեկ է տեղի ունեցել, անգամ Վանիկը ընտանիքին չի տեղեկացրել, որ վնասվածք է ստացել: «Երեկ և  այսօր էլ խոսել ենք հետը, ասեց՝ ամեն ինչ նորմալ ա, հանգիստ եղեք, բայց մի երկու օր չեմ զանգի»>։ Ժամեր անց պարզվեց,  որ Վանիկին տեղափոխել են Սիսիանի հիվանդանոց:

«Եղնիկներ»-ի զինծառայող 19-ամյա Խաչիկ Խաչատրյանին փնտրում է քեռու կինը. «Ուզում ենք հետաքրքրվել՝ էստե՞ղ ա մեր զինվորը: Արդեն չորս օր ա՝ զանգ չի եղել:  Երեխեն դիրքերում ա եղել, հետո դիրքերից իջել ա, զանգել ասել ա, թե գնում ա ճաշարան՝ հաց ուտելու, վերջացնի, կզանգի: Արդեն չորս օր ա՝ իրանից զանգ չկա: Երեկ պատգամավորները էստեղ էին, իրանց ասեցինք, որ տեղյակ չենք մեր զինվորներից, խոստացան, թե կհետաքրքվենք, կզանգենք, բայց հլը խաբարություն չկա»:

Թալիշում ծառայող Հրայր Բաղդասարյանի հայրն արդեն այսօր տեսակցեց որդուն, սակայն տղայի հետ չի խոսել, քանի որ քնած է եղել: Հոր փոխանցմամբ՝ տղան ունի թոքերի և ուսի վնասվածք, ինչպես նաև մի քանի կոտրվածքներ:

Հարազատներից ոմանք վիրավորների շարքում չգտան իրենց զինվորին: Սակայն այս հանգամանքը նրանց առավել անհանգստացրեց, քանի որ չգիտեն՝ ինչպես պարզել որտե՞ղ և ի՞նչ կարգավիճակում է իրենց զինվորը:

Դիանա Ղազարյան