Ապրիլի 1-ի լույս 2-ի գիշերը ղարաբաղաադրբեջանական շփման գծի հյուսիս-արևելյան (գ. Թալիշ) սահմանային գոտում վիրավորված պարտադիր ժամկետային զինծառայող Հրայր Բաղդասարյանը, որը գտնվում է Մուրացանի հոսպիտալում, դուրս է եկել կոմայից։ Նրա մայրը՝ Սեդա Գաբրիելյանը, հասցրել է առավոտյան մեկ րոպեով տեսնել որդուն։

«Մինչ էսօր թույլ չէին տալիս տեսնել, որ կոմայից դուրս է եկել մեկ րոպեով մտա մոտը։ Բուժքույրը հարցրեց՝ ճանաչո՞ւմ ես, ինքն էլ հազիվ ժպտաց, դեմքի արտահայտությունից հասկացանք, որ ճանաչել է։ Ես ուրախությունից խառնված չեմ էլ հարցրել, թե երբ է դուրս եկել կոմայից»։

Ծառայության ընթացքում Հրայրը մեկ անգամ էլ է վիրավորվել ու 3 ամիս պառկել Մարտունիի հոսպիտալում, բայց այդ մասին ընտանիքի անդամներից ոչ մեկը չի իմացել։

«Սա առաջին դեպքը չի. օգոստոսի դեպքերի ժամանակ էլի վիրավորվել է, 3 ամիս պառկել, ու մենք չենք էլ իմացել, ոչինչ չի ասել։ Զանգել է մեկ-մեկ, բայց ասել է, որ լավ է ամեն ինչ։ Հետո, երբ տուն եկավ, կրծքավանդակի վրա՝ ձախ կրծքի մոտ, սպի կար, հարցրի, ասեց, թե բան չկա, թեթև քերծվածքներ է եղել, փոքր բեկոր, ինքն էլ ձեռքով քաշել-հանել է։ Բայց դե հետո իմացանք, որ պառկած է եղել հոսպիտալում։ Հիմա էլ երկու օր հետո ենք իմացել, որ էստեղ է կոմայի մեջ»,-պատմեց տիկին Սեդան։

Տիկին Սեդան դեռ չէր հասցրել խոսել բժիշկներից որևէ մեկի հետ որդու վիճակի մասին, որովհետև բոլորը զբաղված էին նոր հիվանդներով։

Սիլվա Մալինցյան,

ԵՊՀ Ժուռնալիստիկայի ֆակուլտետ