ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Համաշխարհային բանկի հայաստանյան գրասենյակի ղեկավար Ժան Միշել Հափիին եւ Հայաստանի սոցիալական ներդրումների ծրագրի ՀԲ թիմի ղեկավար Իվան Դրաբեկին: Հանդիպմանը մասնակցում էր նաեւ Հայաստանի սոցիալական ներդրումների հիմնադրամի (ՀՍՆՀ) գործադիր տնօրեն Աշոտ Կիրակոսյանը:

Կողմերը գոհունակություն հայտնեցին  ՀԲ -ի եւ  Հայաստանի սոցիալական ներդրումների հիմնադրամի համատեղ ծրագրերի ընթացքի առնչությամբ, արձանագրվեց, որ դրանք իրականացվում են հաջողությամբ եւ նպաստում են մարզերում սոցիալական ենթակառուցվածքների վերականգնմանն ու զարգացմանը:

Քննարկվեցին Սոցիալական ներդրումների հիմնադրամի երրորդ ծրագրի երրորդ լրացուցիչ ֆինանսավորման նախագծի հետ կապված հարցեր: Փոխվարչապետին տեղեկացվեց, որ նախագիծը նախապատրաստման փուլում է  եւ  փետրվարին կներկայացվի ՀԲ տնօրենների խորհրդի հաստատմանը: Քննարկվեցին նախագծի  նախապատրաստման հետ կապված մի շարք տեխնիկական հարցեր:

Մասնավորապես անդրադարձ եղավ  ծրագրով վերանորոգվող եւ վերակառուցվող հաստատությունների հետագա պահպանման, համայնքների կողմից համաֆինանսավորման եւ մի շարք այլ խնդիրների: Նշվեց, որ նախագծում նախատեսվում է ներառել նաեւ  ՏԻՄ-երի կարողությունների զարգացման բաղադրիչ, որի շրջանակում կկազմակերպվի ՏԻ մարմինների ներկայացուցիչների վերապատրաստում: Փոխվարչապետը ողջունելի համարեց նման մտադրությունը: