«Որոշել ենք մի շատ ցավոտ հարցի մասին թերթի միջոցով իրազեկ դարձնել մեր հասարակությանը, մարդկանց, որպեսզի նրանց օգնությամբ, խորհուրդներով դուրս գանք մեզ համար անմխիթար ու անելանելի վիճակից»,-ասում է գործազուրկ Ռոբերտ Բաբայանը։

Ռոբերտ Բաբայանը պատմում է, որ « «ВТБ» բանկի Ստեփանակերտի մասնաճյուղի գլխավոր հաշվապահ Շարմաղ Գրիգորյանի ախորժակն էլ ավելի է բացվել յուրացումներ ու մսխումներ կատարելուց հետո: «Նա որոշեց մարդկանց խաբելու միջոցով՝ դրամաշորթությամբ դառնալ մեծահարուստ»,- ասում է Ռոբերտ Բաբայանը:

Ըստ նրա` Շարմաղ Գրիգորյանը, իրեն ներկայացնելով որպես գործարար մարդ, կեղծ խոստումներով մարդկանց մոտ վստահություն ձեռք բերելով, խարդախությամբ նրանցից կարողացավ կորզել տասնյակ հազարավոր դոլարներ:«Նրա տխրահռչակ գործունեության պատճառով շատ մարդիկ հայտնվեցին աղքատության ճիրաններում, նրանց ընտանիքները կանգնեցին կործանման եզրին»,-ասում է Շ.Գրիգորյանը:

Ռոբերտ Բաբայանը, Համեստ Իշխանյանը, Հրանտ Սաֆարյանը և Աշխեն Սահակյանը իրենց գումարները հետ ստանալու համար դիմել են իրավապահ մարմիններին՝ ոստիկանությանն ու գլխավոր դատախազին: Տեղի ունեցածի մասին իրազեկ են պահել մի քանի դեպուտատների, մարդու իրավունքների պաշտպանի գրասենյակի աշխատողներին: Ռոբերտ Բաբայանն ու Գրետա Ղազարյանը նամակներով դիմել են ԼՂՀ նախագահին:

Ռ. Բաբայանն իր նամակում մասնավորապես գրել էր. «Պրն նախագահ, եղբայրս 1980-ական թթ. լեգենդար «Ղարաբաղ» ֆուտբոլային թիմի ավագ, լեգենդար պաշտպան Վարուժան Բաբայանը հայրենի հողը պաշտպանելիս անհայտ կորավ (1992 թ. օգոստոսի 6): Մեր տանը ինձ հետ միասին այժմ ապրում են նաև երկու եղբայրներս, որոնք 2-րդ կարգի հաշմանդամ են,անգործունակ, իսկ ես էլ նրանց խնամակալն եմ...Ամիսներ շարունակ չեմ կարողանում Շարմաղ Գրիգորյանից ետ վերցնել մեր ընտանիքին պատկանող գումարը և, կապված դրա հետ, մեր ընտանիքը հայտնվել է անելանելի դրության մեջ: Խրվել ենք պարտքերի մեջ ու չենք կարողանում այն մարել, խանութներն էլ պարտքով սննդամթերք չեն տալիս: Ընտանիքի անդամներս այժմ հայտնվել ենք սովի ճիրաններում: Շ. Գրիգորյանը, չվերադարձնելով դրամական-նյութական այդ ամբողջ կարողությունը, դրանով իսկ մեզ զրկել է ապրելու ու գոյատևելու իրավունքից»,- գրել է Ռ. Բաբայանը:

Ոստիկանության քննիչներ Նարեկ Գրիգորյանն ու Իգոր Օհանյանը խոստացան Շարմաղ Գրիգորյանից հետ վերցնել խլած գումարները: Նույնպիսի խոստումներ տվեց ԼՂՀ դատախազության բաժնի պետը: Շատ անգամ են նշված անձիք եղել իրավապահների մոտ, սակայն անարդյունք:

«Երկու տարվա քաշքշուկից հետո մենք մնացինք ձեռնունայն: Մեզ համար միայն մի բան պարզ դարձավ, որ ոստիկանության քննիչներն ու պրն Վանյանն ավելի շատ մտահոգված էին Շ. Ա. Գրիգորյան-Ներսիսյանի ճակատագրով, քան մեր կորցրածի վերադարձմամբ, արդարության վերականգմամբ: Այս պարոնների եղբայրական-հայրական հոգատարությունը «հերոսուհու» նկատմամբ ուներ միայն մի նպատակ՝ հանցագործին ազատել պատասխան տալուց, փրկել նրան: Եվ նրանց ու նմանների մեղքով հանցագործը բանտախցում լինելու փոխարեն գտնվում է ազատության մեջ, չի վերադարձնում զավթած փողերն ու, դեռ ավելին, սպառնում է մեզ՝ պահանջատերերիս հետ հաշվեհարդար տեսնել՝ վկայակոչելով իրավապահ մարմինների աշխատակիցներին»,- բացատրում է տուժածը:

Ռ.Բաբայանն ասում է նաեւ, որ իրավապահ մարմինների արդեն հայտնի աշխատակիցները մշտապես հորդորում էին չդիմել դատարան՝ Շարմաղի գործը չբարդացնելու համար:Բաբայանի ասածի համաձայն, այլևս գոյություն չունեցող «ВТБ» բանկի Ստեփանակերտի մասնաճյուղի աշխատողները խաբել են նաև իրենց ավանդատուներին: Այսպես, Վարդան Երամիշյանին չի վերադարձվել գոնե նախնական գումարը (առանց տոկոսների 10 միլիոն դրամ), Արմեն Դանիելյանին պատկանող 5 միլիոն դրամը:

Շ. Գրիգորյանն արդեն հանգուցյալ Ժյուլա Սարգսյանի հարազատներին պետք է վերադարձնի 300.000 դրամ, Ռոբերտ Բաբայանին` 4,3 միլիոն դրամ, Հրանտիկ Սաֆարյանին՝ 2 միլիոն, Գրետա Ղազարյանին՝ 2 միլիոն, 85-ամյա Աշխեն տատիկին, որի թոռը նահատակվել է Արցախյան պատերազմում՝ 1 600 ԱՄՆ դոլար, Համեստ Իշխանյանին՝ 22 000 դոլար գումար, Նելսոն Սարգսյանին` 1 540 000 դրամ…

«Նման վիճակում հայտնված հուսահատ, նաև չարացած մարդիկ կարող են դառնալ հանցագործներ, դիմել ինքնադատաստանի մեթոդին՝ խաբեբային պատժելու համար: Մարդկանց մի մասն էլ ստորացված զգալով` հուսահատությունից որոշել է լքել իր հայրենիքը, որովհետև այստեղ նրանց պատիվն ու արժանապատվությունը կոխկրտված են... Արդյո՞ք մենակ էր գործում ուրիշների անվամբ ձևակերպած անշարժ ու շարժական գույքերի տեր, մեր փողերը պտտեցնող և շահույթներ ստացող մեծահարուստ Շարմաղ խանումը: Չենք կարծում։ Առայսօր Շարմաղն ու նրա գործակիցները դեռևս խուսափում են պատասխանատվությունից։ Բայց մինչև ե՞րբ…»,-հարցնում է Ռոբերտ Բաբայանը:  

Հայկազ Ղազարյան