Արդեն տեղեկացրել էինք՝ ապրիլի 25-ին, ժամը 21.51-ին Երևանի Հալաբյան փողոցի թիվ 11 շենքի մոտակայքում 63 երթուղուն պատկանող «Bogdan» ավտոբուս է պայթել։ Րոպեների ընթացքում տուժաները դուրս են բերվել և տեղափոխել ամենամոտ՝ «Արմենիա» հանրապետական բժշկական կենտրոն։ Ըստ ՀՀ քննչական կոմիտեի մամուլի խոսնակ Սոնա Տռուզյանի հաղորդած տվյալների՝ պայթյունի պահին ավտոբուսում գտնվել է 10 մարդ` վարորդը եւ 9 ուղեւոր, որոնցից 2-ը տեղում մահացել են, իսկ 7 -ը տարբեր աստիճանի մարմնական վնասվածքներով տեղափոխվել բժշկական կենտրոն:

Վիրավորներից մեկը` 1994 թ. ծնված Արթուր Մարգարյանը, ստանալով համապատասխան բուժօգնություն, դուրս է գրվել հիվանդանոցից:
Տուժածներից երեքն անչափահաս են, որոնցից երկուսի՝ Էդգար Արայիկի Գասպարյանի և Ռոլանդ Սուրենի Խոջայանի առողջական վիճակը գնահատվել ծանր է։

Առողջապահության նախարար Արմեն Մուրադյանը քիչ առաջ հաղորդեց, որ այս պահին յոթ տուժածները գտնվում են հիվանդանոցում, որոնցից բոլորի առողջական վիճակը գնահատել է ծանր, նրանցից երկուսինն էլ ծայրահեղ ծանր՝ հաշվի առնելով տրավմայի բնույթը։

Նախարարն ասաց, որ առավոտ 8:30-ին է հեռացել հիվանդանոցից եւ այդ ընթացքում նրանց հաջողվել է բոլոր տուժածների առողջական վիճակը կայունացնել :

Տուժածներից մեկը պետք է տեղափոխվի ականջաբանության բաժանմունք՝ հաշվի առնելով առկա թաղանթների վնասվածքը։ Րոպեներն առաջ երկու անչափահասներին՝ Էդգար Արայիկի Գասպարյանի և Ռոլանդ Սուրենի Խոջայանին տեղափոխեցին Երևանի «Սուրբ Աստվածամայր» ԲԿ-ն։

Դիանա Ղազարյան