ՀՀ սփյուռքի նախարարության պաշտոնյաների պարբերական   հանդիպումը  վիրահայ  սփյուռքի ներկայացուցիչների հետ, ի տարբերություն նախորդ  տարիների,  այս անգամ տեղի ունեցավ  թբիլիսահայ   համայնքի տանը՝  Հայ առաքելական  սուրբ եկեղեցու  վիրահայոց  թեմին  կից գործող  «Հայարտուն» մշակույթի կենտրոնում:

Նոյեմբերի 17-ին ՀՀ սփյուռքի նախարարության գլխավոր խորհրդական  Ստեփան Պետրոսյանը, Սփյուռքի նախարարության  Կովկասի բաժնի  պետ  Տարոն  Շագոյանը, «ՊՕԱԿՍ»-ի  տնօրեն  Դավիթ  Շահբազյանը և Սփյուռքի  նախարարության  ֆինանսական  բաժնի  պետ Հայկ Հովսեփյանը  այցելեցին Թբիլիսիի  այս  օջախը, և Գալուստ Գյուլբենկյան  սրահում  կայացավ հանդիպում  Հայ առաքելական սուրբ եկեղեցու  վիրահայոց թեմի առաջնորդ  տեր Վազգեն եպիսկոպոս Միրզախանյանի, Վրաստանի  նախագահի խորհրդական Վան Բայբուրթյանի, բանաստեղծ-թարգմանիչ Գիվի Շահնազարի, երկու գործող  եկեղեցիների  հոգևոր հայրերի և  եկեղեցու  ծառայողների, համայնքային կազմակերպությունների ղեկավարների, հայ  մտավորականության ներկայացուցիչների հետ:

Տարեվերջին  սփյուռքահայությանը՝ ՀՀ սփյուռքի  նախարարության կատարած  գործերի մասին իրազեկելու  միտումով  գլխավոր խորհրդական  Ստեփան Պետրոսյանը  հավաքվածներին  ներկայացրեց  այն ծրագրերի և  նախագծերի մասին,  որոնց ակտիվ մասնակցել է Վրաստանի հայ համայնքը: Պարոն Պետրոսյանը  առանձնահատուկ նշեց, որ  այս տարի  վիրահայ համայնքի մի քանի արժանավորներ  արժանացել են Մովսես Խորենացի և  Վիլյամ Սարոյան շքանշանների,  մշակույթի, կրթության, սփյուռքի նախարարությունների  պատվոգրերի և  շնորհակալագրերի, ինչպես նաև ընդգծեց  վիրահայերի հաջողությունները «Արի տուն», «Մեկ ազգ, մեկ մշակույթ», «Հայ  լրագրողների հավաք» միջոցառումներին: Նա հանդիսավորությամբ Թբիլիսիի «Անի» համույթի պարուսույց Անգելինա  Նազարյանին  հանձնեց  ՀՀ սփյուռքի նախարարության  պատվոգիրը:

Վիրահայ  համայնքին շնորհավորելով  «Հայարտուն» մշակույթի  կենտրոնի  բացման կապակցությամբ`  խորհրդական Ստեփան  Պետրոսյանը նշեց, որ  ինքը դատարկաձեռն  չի եկել և  «Հայարտանը» նվեր է  բերել  համակարգիչներ,  որոնք, անշուշտ,  կծառայեն  հայաբնակ այս  քաղաքում ազգապահպանության  գործին:

Այնուհետև  ՀՀ սփյուռքի նախարարության ներկայացուցիչները  պատասխանեցին  հավաքվածների  հարցերին,  որոնք  վերաբերում էին Վրաստանի  կողմից  Ցեղասպանության ճանաչման, Թբիլիսիում հայկական դպրոցների  լուծարման խնդիրներին, հայերեն  հաղորդաժամի  վերսկսմանը,  Թբիլիսիի  մանկավարժական համալսարանում հայ-վրացերեն լեզուներով մասնաճյուղի  վերաբացմանը միջպետական  մակարդակով  օժանդակելու  հարցերին:

Վիրահայոց թեմի առաջնորդ տեր Վազգեն եպիսկոպոս  Միրզախանյանը, երախտիքի խոսք ուղղելով սփյուռքի նախարարության ներկայացուցիչներին այցելության, հետաքրքիր հանդիպման և  նվերների համար, դիմեց նրանց  Վրաստանի  դպրոցներում,  ի մասնավորի  հայ աշակերտության մեծաքանակության, շաբաթական մեկ անգամ  հայերենի  ժամեր  մտցնելու   առաջարկությամբ, ինչպես  նաև հավելեց, որ ոչ հեռու  ապագայում Վրաստանում ՀՀ դեսպանությունում կլինի Համայնքային  աշխատանքների գծով   համակարգող-կցորդի   հաստիքային  աշխատող:

Նոյեմբերի 18-ին ՀՀ նախարարության ներկայացուցիչները  հանդիպում են ունենալու  Վրաստանի  հայ  երիտասարդական կազմակերպությունների և հայ  ուսանողության հետ: