Երևանի և Ստեփանակերտի քաղաքապետարանների միջև հաստատված համագործակցության ծրագրի շրջանակում ԼՂՀ մայրաքաղաք Ստեփանակերտում կիրականացվի «Ազատամարտիկների այգու» կառուցման ծրագիրը: Այս մասին տեղեկացնոմ է քաղաքապետարանի տեղեկատվության և հասարակայնության հետ կապերի վարչությունը:

Պաշտոնական այցով Ստեփանակերտում գտնվող Երևանի քաղաքապետ Տարոն Մարգարյանը Ստեփանակերտի քաղաքապետ Սուրեն Գրիգորյանի և Արցախի ազատամարտիկների միության նախագահ, գեներալ-մայոր Սամվել Կարապետյանի ուղեկցությամբ այցելել է «Ազատամարտիկների այգի», ծանոթացել շուրջ 2 հա զբաղեցնող հանգստի գոտու կառուցման աշխատանքների ընթացքին:

Նախագծերի վրա ներկայացնելով ծրագրի մանրամասները՝ պատասխանատուները նշել են, որ այգու ձևավորումը կառանձնանա ճարտարապետական և տեղանքի ինքնատիպ լուծումներով, շատրվանային համալիրներով ու ծառուղիներով: Կկառուցվի նաև ամֆիթատրոն՝ ներկայացումներ և միջոցառումներ կազմակերպելու համար:

Այգու տարածքով կապահովվի նաև հետիոտնի կապը Թումանյան փողոցից դեպի դպրոց, մարզադաշտ և հրապարակ: Պատասխանատուները վստահեցրել են, որ այն հարմարավետ ու սիրված հանգստի վայր կդառնա ինչպես Ստեփանակերտի բնակիչների, այնպես էլ ԼՂՀ մայրաքաղաքի հյուրերի համար: