Ազգային ժողովի քառօրյան վերածվեց «iPad-ամոլության» (տեսանյութ)
Ազգային ժողովի նիստերը հետզհետե ձանձրալի են դառնում պատգամավորների համար, և նրանք ճարահատյալ սկսում են օրենքներ գրելու փոխարեն անվերապահորեն հավանություն տալ կառավարության բերած ցանկացած օրինագծի: Ազգային ժողով տհաճությամբ են մտնում նաև կառավարության անդամները: Բայց, քանի որ նրանք ի պաշտոնե ստիպված են մեկ-մեկ լինել օրենսդիր մարմնում, ապահովում են միայն ֆիզիկական ներկայություն, իսկ մտքով ընդհանրապես այլ տեղ են:
Անցած քառօրյայի միակ հիշարժան պահը էներգետիկայի և բնական պաշարների նախարար Արմեն Մովսիսյանի խաղն էր, ավելի ճիշտ՝ շարիկ գլորելը: Նախարարն ի՞նչ իմանար, որ իր գործընկերոջ՝ կրթության և գիտության նախարար Արմեն Աշոտյանի iPad 2-ը և շարիկ գլորելու անմեղ զբաղմունքը պատուհաս են դառնալու իր համար:
Այդ թեման անցյալ շաբաթ այնքան էր քննարկվել Ազգային ժողվում, որ պատգամավորներից ոմանք ստիպված եղան իրենց մոնիտորները տեղահան անելով ու «պառկացնելով» iPad-ի տեսք տալ: Բարեբախտաբար, պատգամավորները դրանցով խաղեր չէին կարող խաղալ, առավել ևս՝ շարիկ գլորել, բայց գոնե այդպիսով ուշադրություն էին գրավում:
Մի քանի պատգամավորներ էլ աչքի ընկնելու համար սկսեցին իրենց հեռախոսները «բզբզել», որպեսզի լրագրողներն իրենցով էլ մեկ-մեկ հետաքրքրվեն, սակայն ԱԺ փոխնախագահ Սամվել Բալասանյանի վարած նիստերը շատ ավելի հետաքրքիր ու զավեշտալի էին, քան պատգամավորների արարմունքը:
ԱԺ քառօրյայի վերջին օրը՝ նոյեմբերի 17-ին՝ բյուջեի քննարկման ժամանակ, Սամվել Բալասանյանը փոխանակ ասեր, որ բյուջետային քննարկումները հետաձգվում են առնվազն 4 օրով, առհասարակ ասաց, որ քննարկումներն են հետաձգվում, ինչից հետո պատգամավորները լքեցին դահլիճն ու այլևս չվերադարձան: Արդյունքում Սամվել Բալասանյանից բացի, ԱԺ-ում մնաց միայն մեկ պատգամավոր՝ նորընտիր Մուշեղ Պետոյանը:
Էկոնոմիկայի նախարար Տիգրան Դավթյանը ստիպված էր մեկ պատգամավորի համար բյուջեի քննարկում կազմակերպել և նրան դիմել «հարգելի պատգամավորներ» դիմելաձևով:
Մեկնաբանություններ (1)
Մեկնաբանել