HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Դիանա Ղազարյան

Բողոքի ակցիա՝ հանուն խոսքի ազատության

Երեկ Հայաստանյան լրատվամիջոցների 13 ղեկավարներ հայտարարություն էին տարածել այսօր կայանալիք «Հանուն խոսքի ազատության» բողոքի ակցիայի մասին:

Բողոքի ակցիան նախաձեռնող հայաստանյան առաջատար լրատվամիջոցների մի խումբ ղեկավարներ դատապարտում են լրագրողների դեմ իրականացվող հարձակումները, պահանջում՝ անհապաղ պատժել լրագրողների մասնագիտական գործունեությունը խոչընդոտողներին: Ազատության հրապարակում հավաքված մի շարք ԶԼՄ-ների ներկայացուցիչներ ստորագրեցին և հրապարակեցին հայտարարություն, որում ասվում է՝

«Թեեւ գործող իշխանությունը առիթը բաց չի թողնում հայտարարելու, որ կարեւորում է մամուլի, խոսքի ազատության դերը, սակայն փաստացի արվում է ամեն ինչ՝ լրագրողների աշխատանքը խոչընդոտելու, դժվարացնելու եւ տարաբնույթ ճնշումներ բանեցնելու համար: Պետական մակարդակով տարիներ շարունակ հետեւողականորեն լրագրության դաշտը վարկաբեկվում է, փորձ է արվում չորրորդ իշխանության նկատմամբ անվստահություն սերմանել հասարակության շրջանում՝ ինչպիսին առկա է մեր երկրում օրենսդիր, գործադիր ու դատական իշխանության նկատմամբ:

Բազմաթիվ առիթներ են եղել՝ արձանագրելու, որ լրագրողների նկատմամբ իշխանության տարբեր ճյուղերում առկա է ակնհայտ ագրեսիվ վերաբերմունք, որը ժամանակ առ ժամանակ դրսեւորվում է զանգվածային ակցիաների ընթացքում՝ բռնություններով: 

Նախորդ տարի հունիսի 23-ին «Էլեկտրիկ Երեւան» բողոքի ակցիաների ժամանակ լրագրողները թիրախավորված ծեծի ենթարկվեցին ու մինչ օրս որեւէ մեկը պատասխանատվության չի ենթարկվել: Իսկ այս տարվա հուլիսյան իրադարձություններից հետո թեեւ ՀՀ Հատուկ քննչական ծառայության կողմից հայտարարվեց, որ 2 ոստիկանի նկատմամբ մեղադրանք է առաջադրվել, այնուամենայնիվ չկա որեւէ երաշխիք, որ բոլոր մեղավորներն իրենց գործողություններին համարժեք պատժի են արժանանալու: Այսպես այլեւս շարունակվել չի կարող: 

Մենք կարծում ենք, որ օգոստոսի 1-ին ՀՀ նախագահ Սերժ Սարգսյանի խոսքում հնչած ներողությունը եւ մոռանալու հորդորները՝ ուղղված հուլիսի 29-ին իրենց մասնագիտական պարտականութունը կատարող լրագրողներին, բավարար չեն՝ Հայաստանում անվտանգ ու ազատ լրատվական գործունեություն ծավալելու համար: Անհրաժեշտ են գործնական եւ տեսանելի քայլեր: 

-Բոլոր այն մարդիկ՝ անկախ իրենց կարգավիճակից, ովքեր համարձակվել են հուլիսի 29-ին նպատակաուղղված ձեռք բարձրացնել լրագրողների վրա, մասնագիտական գործիքներ կոտրել, բռնություն գործադրել, պետք է առավելագույնը 2 ամսվա ընթացքում ՀՀ քրեական օրենսգրքի 164 հոդվածով նախատեսված (Լրագրողի մասնագիտական օրինական գործունեությանը խոչընդոտելը) հատկանիշներով քրեական պատասխանատվության ենթարկվեն: Լրագրողական հանրությունը սպասում է կոնկրետ քայլերի, պետք է կալանավորումներ լինեն։ 

-
Լրագրողների նկատմամբ պետական մակարդակով իրականացվող բացասական քարոզչությունը պետք է դադարեցվի. մենք գործում ենք՝ ՀՀ Սահմանադրությամբ նախատեսված՝ քաղաքացու տեղեկացված լինելու իրավունքն ապահովելու համար եւ հույս ունենք, որ հասարակությունն անտարբեր չի մնա իրավիճակի նկատմամբ:

-
Լրագրողական դաշտում կա վճռականություն՝ համախմբված պայքարելու մեր մասնագիտական իրավունքների պաշտպանության համար: Եւ մենք պատրաստ ենք օգտագործելու լրագրողական բոլոր՝ ընդհուպ մինչեւ ծայրահեղ միջոցները՝ այդ նպատակին հասնելու համար, եթե այս հայտարարությունը չունենա կոնկրետ հետեւանքներ»:

 

ՀՀ ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանը միայն նախաքննության ավարտից հետո կփաստի՝ ոստիկանների գործողություններում միտումնավորություն եղել է, թե ոչ: ԶԼՄ ներկայացուցիչներին ևս հորդորում է՝ ժամանակից շուտ գնահատականներ չտալ:

Ահարոնյանը ասում է, որ երբ ոստիկանությունը գործողություն է իրականացնում, և լրագրողները այդ պահին գտնվում են բախման մեջտեղում, հնարավոր է` նրանք վնասվածքներ ստանան, սակայն դա չի արվում՝ նրանց մասնագիտական գործունեությունը խոչընդոտելու նպատակով: «Ոստիկանությունը պարտավոր է անել իր գործողությունը: Եթե նկատել եք, նախապես զգուշացվում է՝ հարգելի լրագրողներ, ոստիկանությունը պատրաստվում է հատուկ միջոցներ կիրառել, և լրագրողները պարտավոր են որոշակի անվտանգ տարածություն պահել: Մենք պետք է աշխատենք լրագրողներին չխոչընդոտել՝ իրենց մասնագիտական գործողությունները իրականացնելիս, իսկ լրագրողները պետք է հասկանան, որ իրենց գործունեությունից չպետք է տուժի ոստիկանների աշխատանքը».-նշում է ոստիկանության ներկայացուցիչը:

Ահարոնյանը խոսքով` պետք է աշխատանքներ տարվեն լրագրողների և խմբագիրների հետ, իսկ իրենք ոստիկանների հետ աշխատանքներ տանում են, և ոստիկանները ունեն հատուկ ուղեցույցներ, որոնցով առաջնորդվում են:

Դավիթ Ալավերդյանը

«Մեդիամաքս» գործակալության գլխավոր խմբագիր Դավիթ Ալավերդյանը կարծում է, իշխանությունը ամեն ինչ անում է՝ լրագրողական դաշտը աղճատելու և աղտոտելու համար՝ լրագրողներին հաճախ մեղադրելով բոլոր այն մեղքերի համար, որոնք այսօր կան հասարակությունում՝ մոռանալով, որ լրագրողները՝ առկա երևույթների միայն արտացոլողն են, և ոչ՝ստեղծողը:

«Բախումների և հավաքների ժամանակ ակնհայտ երևում է, որ անձը լրագրող է, ոչ` ցուցարար: Այսինքն՝ նրանց ակցիայի մասնակցի հետ շփոթելը անհնար է: Նշել, որ լրագրողները պատահաբար են զոհ դարձել, կարծում եմ՝ թյուրիմածություն է»,- ասում է խմբագիրը:

Աշոտ Ահարոնյանի այն դիտարկմանը, թե աշխատանք պետք է տարվի լրագրողների և խմբագիրների հետ, Ալավերդյանը՝ որպես Երևանի պետական համալսարանի դասախոս, առաջարկեց համապատասխան անվճար դասախոսություններ և վերապատրաստման աշխատանքներ տանել ոստիկանների հետ՝ բացատրելով, թե նման իրավիճակներում ինչպես են զարգացած երկրներում աշխատում լրագրողների հետ՝ ձեռնարկելով այնպիսի քայլեր, որ նրանք չտուժեն:

լուսանկարները` Սարո Բաղդասարյանի

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter