Քիչ առաջ Վերաքննիչ քրեական դատարանը մերժեց «Սասնա ծռեր» խմբի անդամ Պավլիկ Մանուկյանին ազատ արձակելու միջնորդությունը։ Փաստաբան Հարություն Բաղդասարյանը ենթադրում է, որ մերժման հիմքում որպես հիմնավորվում դրվել է Մանուկյանի կողմից փախուստի դիմելու, խուսափելու կամ թաքնվելու հանգամանքը:

Դեռևս երեկ նույն դատարանում բողոքարկվում էր Մանուկյանի նկատմամբ կիրառված կալանքի որոշումը։ Երեկվա նիստին Պ. Մանուկյանին արդարադատության նախարարության «Դատապարտյալների հիվանդանոց» ՔԿՀ-ից շտապօգնության մեքենայով տեղափոխել էին դատարան։ Պավլիկ Մանուկյանը դատարանում հայտարարել էր․ «Ես «Սասնա ծռեր»-ի թուր կեծակին եմ և այդ թուր կեծակին երբեք էլ պատյան չի մտնելու: Բարձրացրել ենք, մենք պետք է կարողանանաք հասնել հաղթանակի»։

Մանուկյանի փաստաբան Ինեսսա Պետրոսյանը նշել էր, որ իր պաշտպանյալի կալանվորման որոշման մեջ բացի ենթադրություններից այլ փաստեր չեն ներկայացվել:

Փաստաբանը հարցադրում է ներկայացնում, թե ինչպես Պ.Մանուկյանը, ազատության մեջ մնալով, կարող է խոչընդոտել նախաքննության ընթացքին։ Պետրոսյանը Մանուկյանի` երկրից չհեռանալու ակնհայտ փաստ է համարում նրա առողջական վիճակը, որը ապացուցում է, որ նա գամված է անկողնուն և ինքնուրույն տեղաշարժվելու հնարավորություն չունի։ Փաստաբանի խոսքով` Մանուկյանն էլ դատարանում հայտարարել է՝ եթե նույնիսկ իշխանությունները ինձ արտաքսեն, ես հետ եմ վերադառնալու իմ հայրենիք։