Տեսանյութեր
Լուսանկարներ
Դատարանում քննվում է գլխավոր դատախազի պաշտոնակատարի անգործության հարցը
Ամալյա Մարգարյան
Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում քննվում էր «Հիմնադիր Խորհրդարանի» անդամ Կարո Եղնուկյանի պաշտպան, փաստաբան Տիգրան Հայրապետյանի վերաքննիչ բողոքն ընդդեմ ՀՀ գլխավոր դատախազի պաշտոնակատար Արմեն Հարությունյանի անգործության:
Տիգրան Հայրապետյանը վերաքննիչ բողոք է ներկայացրել դատարան, քանի որ կարծում է, որ իր կողմից ներկայացրած միջնորդությունները գլխավոր դատախազի պաշտոնակատարի կողմից չեն ենթարկվում քննության կամ դրանք արվում են ձևականորեն:
Դատական նիստը հետաձգվեց, քանի որ դատարան չէր ներկայացել գլխավոր դատախազի պաշտոնակատար Արմեն Հարությունյանը:
Փաստաբանների պալատի անդամ Տիգրան Հայրապետյանը, մեկնաբանելով պատասխանող կողմի բացակայությունը, նշեց, որ այս դատական նիստից ավելի կարևոր գործ չպետք է լինի Ա. Հարությունյանի համար: «Գլխավոր դատախազի պաշտոնակատարը չէր կարող ունենալ ավելի կարևոր գործ, քան այստեղ քննարկվող իր անգործությունն ու կոմպետենտությունը: Հետևաբար, եթե ավելի կարևոր գործ ունի, քան իր պաշտոնավարման հետ կապված այս հարցերը, սա ևս ապացուցում է, որ նա կոմպետենտ չէ գլխավոր դատախազ լինելուն»,- ասաց փաստաբան Տիգրան Հայրապետյանը:
Նիստը նախագահող դատավոր Ա. Վարդանյանը հայտնեց, որ հաջորդ դատական նիստին կփորձեն ապահովել Արմեն Հարությունյանի ներկայությունը: Ինչպես նաև բավարարելով փաստաբանի ներկայացրած միջնորդությունը՝ հայտնեց, որ հաջորդ դատական նիստին ներկա կգտնվի Կարո Եղնուկյանը:
Հիմնադիր խորհրդարանի անդամ Կարո Եղնուկյանը մեղադրվում է «Սասնա ծռեր» խմբավորման անդամներին օգնելու, օժանդակելու և տեղեկություններ փոխանցելու համար: Նա հուլիսի 19-ի լույս 20-ի գիշերը բերման է ենթարկվել իր բնակարանից, հետագայում նրա նկատմամբ կայացվել է կալանքի որոշում:
Մեկնաբանություններ (1)
Մեկնաբանել