Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը մերժեց «Ոտքի Հայաստան» քաղաքացիական նախաձեռնության անդամ Անդրիաս Ղուկասյանի՝ խափանման միջոցը վերացնելու և գրավի դիմաց ազատ արձակելու միջնորդությունը: 

Գործով փաստաբան Կարեն Մեժլումյանը «Հետք»-ին փոխանցեց, որ դատական նիստին ներկա է գտնվել նաև Ղուկասյանը և դատարանում հայտարարությամբ հանդես եկել՝  ներկայացնելով իր առարկությունները։ Սակայն թե ինչ առարկություններ է ներկայացրել Ղուկասյանը, փաստաբանը չցանկացավ մանրամասնել։

Մեզ հետ ունեցած հեռախոսազրույցի ժամանակ փաստաբանի հետ էր նաև Անդրիաս Ղուկասյանը, ով փոխանցեց, որ առողջական վիճակն ու ինքզգացողությունը լավ է։

Հիշեցնենք, որ Ղուկասյանը մեղադրվում է ՀՀ քրեական օրենսգրքի 225 հոդվածի առաջին մասով, այն է՝ զանգվածային անկարգություններ կազմակերպում։