Գայանե Սարգսյան

«Հետքի»  հարցերին պատասխանում է «Լուսավոր Հայաստան» կուսակցության Վանաձորի ավագանու թեկնածու Քրիստ Մարուքյանը։   

-Որպես Վանաձորի քաղաքապետի թեկնածու ի՞նչ ծրագրերով եք ներկայանում վանաձորցուն:

-Մեր ծրագրերը խարսխված են լինելու արդյունավետ կառավարման մեթոդների և մոտեցումների ներդրման, շահերի բախումների հնարավորությունը բացառող մեխանիզմների վրա, հաշվետվողականության,  թափանցիկության, մասնակցայնության, այսինքն՝ այն բոլոր բաները, որ լավագույն  կառավարման մեխանիզմների մեջ գոյություն ունեն,  փորձելու ենք ներդնել Վանաձորի կառավարման մեջ:

-Ըստ Ձեզ, որո՞նք են Վանաձորի երեք կարևորագույն խնդիրներն ու ինչպե՞ս եք տեսնում դրանց լուծումները:

-Երեք կաևորագույն խնդիրները նրանք են, որոնց մասին 17 տարի է լսում ենք, բայց ընդհանրապես առաջընթաց չկա: Սկսած ասֆալտապատման-ճանապարհաշինության խնդիրներից վերջացրած աղբահանությունով ու փողոցային լուսավորությունով: Հաջորդը կարող է  դիտարկվել թափառող կենդանիների խնդիրը, որովհետև այս նշված 3-4 ուղղություններով մենք անընդհատ լսում ենք, որ ինչ-որ գործողություններ են իրականացվում, իբր թե ծախսեր են կատարվում, բայց բոլոր ուղղություններով էլ ունենք ձախողումներ: Դրանց համակարգային լուծումներ տալուց հետո մենք ընդհանրապես կմոռանանք նման խնդիրների մասին և կանցնենք զարգացման ծրագրերի իրականացմանը, որը թույլ կտա ռեսուրսների արդյունավետ օգտագործմամբ, դրսից ռեսուրսներ ներգրավելով սկսել քաղաքի զարգացմանն ուղղված քայլեր:

 -Որքանո՞վ է համայնքի բյուջեն բավարար քաղաքի հիմնական խնդիրները լուծելու համար:

-Իհարկե, համայնքի բյուջեն կարողէ բավարար չլինել, բայց պետք է հասնել նրան, որ եղած միջոցները 100 տոկոսով օգտագործվեն հանուն այն նպատակների, որի համար դուրս են գրվում:Պետք է բացառել որևիցե ատկատներ, բացառել չարաշահումներ գնումների պրոցեսների մեջ, շուկայականից էականորեն թանկ գնով ձեռքբերումներից խուսափել ընդհանրապես: Այսինքն՝  իրականացնել արդյունավետ վերահսկման մեխանիզմներ, որոնցով հնարավոր կլինի բացառել ռեսուրսների չարաշահումը, մսխումն ու ոչ նպատակային ծախսումները:

Երբ մենք կհասնենք նրան, որ վերջին լուման կծախսվի իր նպատակին, որը բոլորը կտեսնեն թափանցիկության շնորհիվ, նոր դրանից հետո հնարավոր կլինի դրսից կամ քաղաքի ներսից ներգրավել այլ ռեսուրսներ: Դրանք մինչ այժմ չեն ներդրվել, որովհետև ներդրում կատարել ցանկացողները հասկացել են, որ եղած ռեսուրսները ծախսվում են ոչ նպատակային և իրենք ոչ մի մոտիվացիա չեն ունեցել հավելյալ ներդրումներ կատարել հանուն քաղաքի զարգացման:

 -Հաջորդ հարցը հենց ներդրումների մասով է: Քաղաքի զարգացմանն ուղղված ի՞նչ ներդրումային ծրագրեր  եք ակնկալում բերել Վանաձոր:

-Մենք ակնկալում ենք տուրիզմի զարգացման ուղղությամբ ծրագրերի իրականացում: Դա վերաբերում է նաև տարածաշրջանային հանգույց դառնալու մեր շատ լավ պոտենցիալը օգտագործելուն: Եթե Վանաձորի աշխարհագրական դիրքը նայենք, մենք Հայաստան-Վրաստան տարանցիկ ճանապարհի վրա ենք, բայց որևէ ձևով չենք օգտվում մեր մարզով անցնող երթևեկության հոսքից: Երբ դու ունենում ես առաջարկ, այդ անցնող հոսքը ոչ թե աշխատում է մեկ րոպե շուտ դուրս գալ Վանաձորից, այլ աշխատում է հնարավորիս երկար մնալ Վանաձորում, ինչը ենթադրում է ծախսեր մնալու համար, ուտելու համար… Պետք է մշակութային ինչ-որ առաջարկներ ունենալ Վանաձորում, որը բերի մարդկանց ներհոսքի, ոչ թե արտահոսքի:

Բացի դա կարող է լինել համագործակցություն մեր քույր քաղաքների և ընդհանրապես դրսի ներդրողների հետ, որոնք տարբեր սոցիալական կամ էկոլոգիական խնդիրների լուծման շրջանակներում կարող են իրականացնել քաղաքի լուսավորության հետ կապված ծրագրեր, տնակային մանկապարտեզների կառուցման, մեր տնակային ավանների խնդիրների լուծմանն ուղղված ծրագրեր:

Մարդիկ դրսում ունենալով ինչ-որ հաջողություններ, միշտ էլ ցանկացել են ինչ-որ ներդրում կատարել Վանաձորւմ: Բայց երբ ներդնողը գալիս է և իր առաջ դնում են այլ պայմաններ,  տնտեսագիտության օրենքների համաձայն փողը հոսում է այնտեղ, որտեղ ավելի հարմար է ու շահավետ: Մենք չենք ապահովել այդ շահավետ պայմանները, որպեսզի դեպի Վանաձոր դրամական ռեսուրսներ հոսեն: Մենք ամեն ինչով վանել ենք ներդրողներին ու կազմկերպություններին, որոնք պարզապես իրենց ծրագրերի իրականացման համար ադեկվատ միջավայր են փնտրել, բայց չեն գտել Վանաձորում :

-Վանաձորցին այս ընտրություններին ընտրության  մեծ հնարավորություն ունի: Ինչո՞ւ պետք է ընտրեն հենց Ձեզ:

-Ընտրության մեծ հնարավորությունը  մի քիչ պատրանքի նման է, որովհետև դաշտում առկա ուժերը, որոնք այս պահին ներկայանում ե ն որպես նորություն բերող, իրականում տարբեր ֆորմատներով և տարբեր ժամանակահատվածներում հայտնի են եղել մարդկանց:

Ինչո՞ւ պետք է ընտրել «Լուսավոր Հայաստանին»: Որովհետև «Լուսավոր Հայաստանն» այն ուժն է, որը ձևավորվել է դրական փորձի վրա: Այստեղ հավաքված է մարդկանց թիմ, որոնք ավելի շատ տվող տեսակ են, քան վերցնող: Սա ինքնահաստատման խնդիրներ լուծողների թիմ չէ, որը պատրաստվում է դառնալ ավագանու անդամ ու գլուխ գովել, թե ես էլ եմ ավագանու անդամ: Նման խնդիրներ չունենք և հետևաբար  այս ընտրություններին մասնկացելու մեր միակ նպատակը Վանաձորի զարգացումն է: Մենք մինչև հիմա ի դեմս Էդմոն Մարուքյանի ունեցել ենք մի պատգավոր, որը ցույց է տվել աշխատանքի և քաղաքական մշակույթի ընդհանրապես նոր տեսակ և հիմա լավ  հնարավորություն կա այդ տեսակը շատացնելու: Այսինքն՝  մենք գնում ենք լույսը շատացնելու, այլ  ոչ թե խավարի դեմ պայքարելու ճանապարհով: