ԱԺ ՀՅԴխմբակցության ղեկավար ԱրմենՌուստամյանը, անդրադառնալով երեկ կառավարության նիստին նորանշանակ վարչապետ Կարեն Կարապետյանի այն խոսքին, որ չի հավատում էկոնոմիկայի նախարար Արծվիկ Միասնյանի դիտարկմանը, ասում է, որ իրենց կուսակցությունն իսկապես պաշտպանել է վարչապետի նշանակումը և լիահույս է, որ Կարապետյանը խորապես գիտակցում է երկրի առջև ծառացած խնդիրները, և դրանք լուծելու կարողություն ունի։

Սակայն, նախորդ փորձերը նկատի ունենալով, Ռուստամյանը կարծում է, որ այդ ամենը պետք է կատարվի կոնկրետ քայլերի միջոցով, և պետք է զերծ մնալ շոուների տրամաբանությանը համապատասխանող, տպավորություն ստեղծող քայլերից, քանի որ, ըստ նրա, դրանք կարող են կարճաժամկետ կյանք ունենալ։

«Կառավարությունն այն տեղը չէ, որտեղ վարչապետը պետք է հավատա կամ չհավատա։ Պետք է ստուգեն, եթե մի բան կա, տեսնում ես, էլ դրա հավատալը ո՞րն է։ Չկա՞, ուրեմն առավել ևս հավատալու խնդիր չկա։ Սա «հավատափորձության» տեղը չէ։ Այն կառավարություն է, որտեղ կոնկրետ գործեր պետք է կատարավեն, և այդ կոնկրետ գործերը կամ կան, կամ չկան»,-նշում է Ռուստամյանը։

Խմբակցության ղեկավարը կարծում է, որ նորանշանակ վարչապետը պետք է առավելագույն կերպով ծանոթանա բոլոր ոլորտներում կատարված-չկատարված քայլերին: Հավատի միջոցով կառավարությունում քննարկումներ անելը Ռուստամյանը ճիշտ ճանապարհ չի համարում։ Նրա դիտարկմամբ՝ պետք է հասկակալ, որ երկրում լրջագույն խնդիրներ են կուտակվել, որոնք օր առաջ պետք է սկսել լուծել։

Խմբակցության ղեկավարը նաև շեշտում է, որ իրենց կուսակցությունը ամբողջությամբ վստահում է  Արծվիկ Մինասյանին, քանի որ նա քաջատեղյակ է իր համակարգից: Ռուստամյանը վարչապետին առաջարկում է համոզվել Արծվիկ Մինասյանի իմացության մեջ:

Խոսելով նոր ձևավորվող կառավարության մասին՝ Ռուստամյանը  կարծում է, որ իրենց խմբակցության նախարարների մասով փոփոխություններ չեն լինի, բայց եթե լինի էլ, դրանում որևէ ողբերգություն չի տեսնում։

«Եթե մեր նախարարը չի համապատասխանում վարչապետի պատկերացումներին, ուրեմն պրն վարչապետը պետք է այլընտրանք առաջարկի, այլ հայեցակարգ ներկայացնի։ Եվ այդ հայեցակարգերի համեմատության մեջ կերևա՝ ով ինչպես է մտածում, ինչ ծրագրեր կան։ Եվ եթե այդ դեպքում ստեղծվի մի վիճակ, որ վարչապետին «ձեռ չի տալիս» ներկայացված հայեցակարգը, բնականաբար, նա իրավուքն ունի  իրենը պնդել, քանի որ նա է երկրի տնտեսության պատասխանատուն»,-հավելեց Ռուստամյանը։