Արմավիրի մարզի Մեծամոր քաղաքի համայնքի ղեկավարի եւ ավագանու ընտրությունների մեկնարկին պարզվեց, որ ընտրատեղամասերում ավելի շատ են վստահված անձինք, քան ընտրողները: Ընտրությունների մեկնարկից մոտ 5 ժամ անց պատկերը չի փոխվել: Այդ հանգամանքից ելնելով՝ 20/03 տեղամասում հանձնաժողովի քարտուղարը քաղաքապետի անկուսակցական թեկնածու Ավետիք Հարությունյանի վստահված անձի պահանջով ժամանակ առ ժամանակ «ներկա-բացակա» է անում վստահված անձանց և դիտորդներին:

Այս պահի դրությամբ ընտրատեղամասում ներկա են 16 վստահված անձինք ու դիտորդներ: Ընդ որում՝ տղամարդիկ ծխելու պատրվակով անընդհատ ներսուդուրս են անում ընտրատեղամաս:

Ներկաներն իրար հիմնականում ճանաչում են և միմյանց բարեւելու, «ինչ կա-չկա»-ի արդյունքում «տնավարի», աղմկոտ միջավայր են ստեղծում:

Հանձնաժողովի նախագահ Մարտին Ավետիսյանը սկզբում բացատրում էր, որ հնարավոր չէ այդքան ելումուտը գրանցել: Այժմ արդեն կամայականությունները կանխելու նպատակով որոշում կայացրեց. «Կես ժամ ընտրատեղամասից բացակայելու դեպքում պետք է նորից գրանցվել»:

Նարինե Մաթեւոսյան