«Իջեւանի ՃՇՇ» ՓԲԸ-ն  Տավուշի մարզի ընդհանուր իրավասության առաջին ատյանի դատարան հայց էր ներկայացրել «Իջեւան ստուդիա» ՍՊ ընկերության  եւ «Իջեւան ստուդիա» հեռուստաընկերության լրագրող Նաիրա Խաչիկյանի դեմ` պահանջելով պարտավորացնել Նաիրա Խաչիկյանին եւ «Իջեւան ստուդիա» ընկերությանը հրապարակորեն ներողություն խնդրել եւ հօգուտ «Իջեւան ՃՇՇ» ՓԲ ընկերության Նաիրա Խաչիկյանից եւ «Իջեւան ստուդիա» ՍՊԸ-ից համապարտությամբ բռնագանձել  երեք միլիոն դրամ` որպես  փոխհատուցում, եւս երկու հարյուր վաթսունչորս հազար դրամ (որպես դատական ծախս), որից  երկու հարյուր հազար դրամը` փաստաբանին վճարած վարձատրության գումար եւ վաթսունչորս հազարը` որպես վճարված պետական տուրքի գումար:

«Իջեւանի ՃՇՇ» ՓԲԸ հայցադիմումի մեջ նշված է, որ  այս տարվա հունիսի 21-ին հայկական երկրորդ հեռուստաալիքի «Լրաբեր» լրատվական ծրագրով, ինչպես նաեւ «Երկիր Մեդիա» հեռուստաընկերությամբ մի քանի անգամ հեռարձակվել են տեսանյութեր, որոնց մեջ տեղ են գտել «Իջեւանի ՃՇՇ»-ի գործարար համբավը արատավորող արտահայտություններ:

Դատավարությունը  Տավուշի մարզի առաջին ատյանի դատարանի Դիլիջանի նստավայրում սկսվել է օգոստոսի 18-ին, կայացել են դատական մի քանի նիստեր:  Հոկտեմբերի 17-ի նիստում դատարանում ցուցադրվել  են խնդրահարույց տեսանյութերը, կողմերը  ներկայացրել են իրենց նկատառումները:

Լրագրող Նաիրա Խաչիկյանը ոչ մի անգամ դատին չի մասնակցել, դատարանում նրա շահերը պաշտպանում է փաստաբան Գարիկ Գալիկյանը: Իսկ «Իջեւան ստուդիա» հեռուստաընկերությունն այս գործով դատապաշտպան չունի:

Դատական  վերջին նիստը տեղի ունեցավ նոյեմբերի 4-ին, սպասվում էր վճռի հրապարակում: Մարդու իրավունքների պաշտպան Կարեն Անդրեասյանը լրատվամիջոցներով անձի արժանապատվությունը վիրավորելու եւ զրպարտելուն առնչվող   քաղաքացիական օրենսգրքի հոդվածների  սահմանադրությանը համապատասխանելու վերաբերյալ դիմել էր  ՀՀ սահմանադրական դատարան: Դատավոր Շահոյանը դատը հետաձգել էր մինչեւ այս առթիվ Սահմանադրական դատարանի որոշման կայացումը: Սահմանադրական դատարանի որոշումը հրապարակվել է, սակայն դատավոր Շահոյանը դեռ վերոհիշյալ գործով նիստ չի հրավիրել: