Կոտայքի մարզի Արամուս համայնքի ղեկավարի պաշտոնում առաջադրված թեկնածուները երկուսն են՝ Արամուսի գործող համայնքապետ, անկուսակցական Հրայր Նիկողոսյանը եւ «Բարգավաճ Հայաստան» կուսակցության անդամ Կարապետ Վարդանյանը, ով գյուղի մարզամշակութային կենտրոնի տնօրենն է: Երկու թեկնածուներն էլ ինքնաառաջադրված են:

Հրայր Նիկողոսյանը Արամուսը ղեկավարում է 2002 թվականից: Նախկինում լինելով ԲՀԿ անդամ՝ նա Կոտայքի գյուղական համայնքների այն ղեկավարներից էր, ովքեր 2015 թվականի մարտին կուսակցությունում իրենց գործունեությունը դադարեցնելու վերաբերյալ դիմում էին ներկայացրել ԲՀԿ տարածքային մարմին: Մեզ հետ հեռախոսազրույցում Հրայր Նիկողոսյանը չցանկացավ պարզաբանել, թե ինչու է դուրս եկել կուսակցությունից. «Ինչո՞ւ պիտի պատասխանեմ այդ հարցին: Թող ոչ մեկին դա չհետաքրքրի»,- ասաց գործող համայնքապետը:

Խոսելով գյուղի խնդիրների եւ իր ծրագրերի մասին՝ նա նշեց, որ անելիքներ շատ կան. «Իմ ծրագրի մեջ մտնում են մշակույթի տուն եւ մանկապարտեզ հիմնելը, ճանապարհների բարեկարգումը: Աշխատանքի ընթացքը ցույց կտա հետագա անելիքները»: Արամուսի ղեկավարի խոսքով՝ համայնքի բյուջեն կազմում է մոտավորապես 70 մլն դրամ՝ ներառյալ դոտացիան: Խոսելով նախընտրական քարոզարշավի մասին՝ Հրայր Նիկողոսյանն ասաց, որ գյուղում քարոզարշավ չի ընթանում, բոլորը ճանաչում են իրար:

Համայնքի ղեկավարի թեկնածու Կարապետ Վարդանյանն իր թեկնածությունն առաջադրել էր նաեւ նախորդ ընտրությունների ժամանակ, սակայն ինքնաբացարկ էր ներկայացրել: Այս անգամ էլ նա քարոզարշավ չի իրականացնում: «Անցած անգամ ես պատրաստ չէի իրականացնելու իմ ծրագրերը, այդ պատճառով հանեցի թեկնածությունս»,- մեզ հետ զրույցում ասաց Կարապետ Վարդանյանը՝ հավելելով, որ եթե այս անգամ հույս չունենար չէր մասնակցի ընտրություններին: Նրա խոսքով՝ գյուղում բավականին շատ գործեր կան անելու: «Արամուսում դեռ չկա մանկապարտեզ, սա շատ կարեւոր հարց է: Բացի այդ, պետք է փողոցները լուսավորել, ճանապարհները բարեկարգել»:

Բացի համայնքի ղեկավարից, Արամուսի բնակիչները պետք է ընտրեն նաեւ ավագանու անդամներին: Ավագանու բոլոր 10 թեկնածուները եւս ինքնաառաջադրված են: Նրանցից 6-ը գործող ավագանու անդամներ են:

Մարինե Ստեփանյան