Գայանե Սարգսյան

Լոռու մարզի Ստեփանավանի տարածաշրջանի Հոբարձի համայնքում հոկտեմբերի 2-ին կանցկացվեն համայնքապետի ու ավագանու ընտրություններ: Գործող համայնքապետ Մարտուն Միրզոյանն այս ընտրություններին իր թեկնածությունը չի առաջադրել: 2008 թվականից պաշտոնավարող 76-ամյա համայնքապետն ասում է, որ առողջական խնդիրների պատճառով այլևս չի ցանկանում աշխատել այդ պաշտոնում:

Համայնքապետի պաշտոնի համար այս ընտրություններին մրցակցում է երեք թեկնածու. համայնքապետի տեղակալ, անկուսակցական Գագիկ Ղարաջյանը, գյուղապետարանի հաշվապահի որդին՝ անկուսակցական, 33-ամյա Ռուսլան Ղարաջյանը և նախկինում որպես գյուղապետ աշխատած Մուրադ Ղարաջյանը:

Շուրջ 25 տարի համայնքապետարանում աշխատած Գ. Ղարաջյանն ասում է, որ առաջադրվելու որոշումը կայացրել է ներկա գյուղապետի կողմից չառաջադրվելու լուրն իմանալուց հետո միայն:

«Մինչև էսօր չեմ դրել թեկնածությունս, որովհետև որ գյուղապետի հետ աշխատել եմ, աշխատելու ընթացքում իրանք էլի ցանկացել են դնել, ես էլ ոչ մի անգամ խոչընդոտ չեմ առաջացրել: Բայց էս անգամ որ էս գյուղապետն էլ չի դնում իր կամքով, իմ մոտ միտք առաջացավ դնելու»,- ասում է թեկնածուն:

Վերջինս վստահ է՝ ընտրվելու դեպքում երկար տարիների աշխատանքային փորձն ու գիտելիքները թույլ կտան կյանքի կոչել մինչ այժմ չիրականացված ծրագրերը:

«Փողոցային լուսավորությունը շատ քիչ ա, առաջին հերթին ուզում եմ ավելացնեմ լուսավորված փողոցների թիվը: Միջհամայնքային ճանապարհներին ուշադրություն դարձնեմ և ամենակարևորը՝ խորհրդային կարգերի փլուզումից հետո դաշտամիջյան ճանապարհների համար ոչինչ չի կատարվել մինչ օրս: Դա է իմ ուշադրության կենտրոնում: Բարեկարգման կարիք ունի հուշարձանի տարածքը, գյուղապետարանի տարածքում որոշ բաներ կա անելու, որ պետք է արվի», - նախընտրական ծրագիրն է ներկայացնում Գ. Ղարաջյանը:

Թեկնածուն առաջիկա ընտրություններից մեծ ակնկալիքներ ունի, հույս ունի՝ «ժողովուրդը հաշվի կառնի ով ինչ ճանապարհ է անցել, ով ինչ հնարավորություններ ունի»:  

Հայաստանի Հանրապետական կուսակցության անդամ Ռուսլան Միրզոյանը հարցին՝ ինչո՞ւ որոշեցիք առաջադրվել որպես համայնքապետի թեկնածու, պատասխանում է. «Ես չեմ որոշել, գյուղացիք են որոշել: Գյուղացիք ինձ ասել են՝ քեզ հարմար գործ ա, դու կարաս գյուղի համար լավ բաներ անես, ես էլ դրել եմ»:

Նախընտրական քարոզարշավ իրականացնելու հետ կապված հարցին թեկնածուն պատասխանում է՝ պարապ որ ըլնում ենք, անում ենք:

Գյուղացիներին, սակայն, նախընտրական խոստումներ չի տալիս: Գյուղացիներն էլ հետագա անելիքների հետ կապված «ավելորդ» հարցեր չեն տալիս:

«Ինչքան լավ բան հնարավոր ըլնի, պիտի անենք: Սաղ գյուղն էլ գիտի, որ ես ինչ եմ կարում անեմ ու ինչքան բարի մարդ եմ: Թե չէ մնացած ծրագրերը էսօր ինչ էլ ասում են, սուտ ա, դրա համար ես ժողովրդին չեմ խաբում: Հիմի որ ես ուրիշների պես ասեմ գյուղի համար ակումբ եմ սարքելու, աերոպորտ եմ սարքելու, բան, դա ես սուտ եմ ասելու: Մարդիկ գիտեն, որ ես կամեցող տղա եմ, իմ ձեռքից ինչ գալիս ա, մինչև գյուղապետ դառնալն արել եմ ու պիտի անեմ: Մարդիկ էլ ինձ հարցեր  չեն տալիս: Գիտեն,  ես ինչ կարամ անեմ»:

Գյուղի հրատապ լուծում պահանջող հարցերի թվում Ռ. Միրզոյանն առանձնացնում է գյուղ տանող ճանապարհի նորոգման ու ակումբի բացակայության հարցն ու անմիջապես վրա բերում.

«Ես հիմի չեմ կարա ասեմ դա կըլնի, թե չէ, բայց պիտի աշխատենք ըլնի»:

Համայնքապետի երրորդ թեկնածուի՝ Մ. Ղարաջյանի հետ մեզ չհաջողվեց զրուցել: Նրա հեռախոսահամարը չկար նույնիսկ թիվ 32 ընտրատարածքային ընտրական հանձնաժողովում:

Ավագանու անդամության ընտրապայքարին Հոբարձիում մասնակցում է 9 թեկնածու: Նրանցից երկուսը ներկայիս ավագանու անդամներ են: Հատկանշական է, որ առաջադրված բոլոր թեկնածուները արական սեռի ներկայացուցիչներ են: