Արմավիրի մարզի Ծաղկունք գյուղի կանանց հիմնական դժգոհությունը մեջքի ցավերն են: Պատճառը տարվա 12 ամիսներին դույլերով խմելաջուր տեղափոխելն է: Գրեթե յուրաքանչյուր տան բակում արտեզյան հոր կա, որի ջուրն օգտագործվում է բացառապես կենցաղային նպատակով, իսկ խմելաջուր բերում են գյուղի տարածքում գտնվող 6 աղբյուրներից: Այն կանանց բախտն է բերել, որոնց տանը ավտոմեքենա կա: Ծաղկունք գյուղի 329 տնտեսություներից բակում խմելաջուր ունեն 70-ը: Համայնքապետարանում ասում են, որ խմելաջրի հարցը լուծելու համար լուրջ ֆինանսական ներդրումներ են անհրաժեշտ:

Խմելաջուրը Ծաղկունքի միակ խնդիրը չէ, որը դժգոհություն է հարուցում բնակիչների մոտ: Գյուղը ոչ դպրոց ունի, ոչ մանկապարտեզ: Ծաղկունիքի համայնքապետարանի առաջին կարգի մասնագետ Վարդան Կարապետյանը «Հետքի» հետ զրույցում ասաց, որ գյուղը դպրոց չունի դեռեւս 1967թվականից: Այդ տարվանից իրենց եւ հարեւան Հովտամեջ գյուղի աշակերտները հաճախել են Ծիածան գյուղի դպրոց: Արդեն երկու տարի է Հովտամեջում նոր դպրոց է կառուցվել, իսկ ծաղկունքցի մոտ 100 աշակերտ ամեն օր ոտքով ճամփա է ընկնում հարեւան գյուղեր: Մոտ 30 աշակերտ էլ հանրակրթություն ստանում է Էջմիածին քաղաքի դպրոցներում, քանի որ Ծիածանն ու Էջմիածինը գրեթե նույն հեռավորությունն ունեն:

Հատկապես ցածր դասարանցիների համար ոչ միայն փորձություն է ամեն օր մեկ կիլոմետր ճանապարհ կտրելը, այլեւ երկու գյուղերն իրար միացնող կամուրջն անցնելը: Ինչպես Ծաղկունքի համայնքապետարանի աշխատակազմի քարտուղար Նինա Թադեւոսյանը հայտնեց, կամուրջի երկու կողմերի բազրիքները տարիների ընթացքում քայքայվել ու կոտրվել են եւ շատ հնարավոր է երեխաներն ընկնեն Քասախ գետը: Համայնքապետարանը խնդրի մասին տեղյակ է պահել մարզպետարանին ու կառավարությանը: Խոստացել են խնդրին լուծում տալ, սակայն դեռեւս ոչ մի աշխատանք այդ ուղղությամբ չի կատարվել: ««Զիլ» ավտոմեքենան, որ կամուրջի վրայով անցնում է, կամուրջների բազրիքները շարժվում են, այնքան որ քայքայված են»,- ասում է Նինա Թադեւոսյանը:

Ավերված վիճակում է անգամ գյուղի 1892 թ. կառուցված եկեղեցին: Տանիքը գրեթե ամբողջությամբ քանդվել է եւ գյուղացիները մոմը վառում են պահպանված ծածկի մի հատվածում: Հատկապես տեղումներից հետո եկեղեցու ճաքերը խորանում են, ինչը վտանգավոր է դառնում փողոցի անցորդների համար, քանի որ ամեն պահի կարող է այն փլվել:

Այս ամենը ֆինանսական ներդրումներ է պահանջում, իսկ համայնքապետարանից հավաստիացնում են, թե գումար չունեն: Դարձյալ գումարի բացակայությունն է պատճառը, որ չեն կարողանում մանկապարտեզ կառուցել: Վարդան Կարապետյանն ասում է, թե հաշվարկներ արել են` 25-30 մլն դրամ է անհրաժեշտ նոր մանկապարտեզ կառուցելու համար: Քանի որ համայնքապետարանը գումարներ չունի, ուստի ապավինում են հովանավորների օգնությանը, սակայն մինչ օրս բաղձալի բարերարին չեն հանդիպել:

Ծաղկունքի համայնքային բյուջեն 10 մլն 867 հազ դրամ է, 11 մլն 114 հազ. դրամն էլ դոտացիան է: Իհարկե, այս բյուջեով շատ բան հնարավոր չէ անել, սակայն գոնե կամուրջի բազրիքների ամրացման աշխատանքներ կարելի էր կատարել, որպեսզի երեխաներն ապահով հատեն կամուրջը: Մինչդեռ համայնքապետարանը որոշել է այլ «բարիքներով» սիրաշահել ծաղկունքցիներին:

Օրինակ` այս տարվա ավագանու հուլիսի 27-ի թիվ 4 որոշումով 400 հազ դրամ է հատկացվել գյուղի տարեցների հանգիստը կազմակերպելուն: Որոշմանը կից չկա ոչ մի հավելված, որից պարզ դառնա, թե քանի մարդ է այդ գումարի շրջանակներում հանգստացել: Համայնքապետարանից պարզաբանեցին, որ մոտ 60 մարդ  օգոստոսին մեկ օրով մեկնել է Սեւան:

Այս գյուղում չեն մոռանում նույնիսկ երեխաներին: Ծաղկունքում ջանք չեն խնայում համայնքի բյուջեի միջոցներով մեծ ու փոքրին խնջույքներով ու Ձմեռ պապիկներով ուրախացնելու համար: Համայնքապետարանի առաջին կարգի մասնագետ Վարդան Կարապետյանի ասելով, անցյալ տարի գյուղի մինչեւ 10 տարեկան երեխաներին Ամանորի նախօրյակին Ձմեռ պապը նվերներ է բաժանել համայնքապետարանի հաշվին: Այս տարի նույնպես Ձմեռ պապը կայցելի երեխաներին, սակայն արդեն մինչեւ 6 տարեկաններին: «Դուք էլ եք տեսնում, որ ապրանքը թանկանում է, կյանքը դժվարանում է, պիտի տակից կարողանանք դուրս գալ չէ՞»-ասում է Վ. Կարապետյանը:

Ավագանու մեկ այլ` օգոստոսի 9-ի թիվ 4 որոշումով էլ համայնքի ղեկավար Դավիթ Կարապետյանը պարգեւատրվել է 150 հազար դրամով: Ավագանին չի պատճառաբանել իր որոշումը, թե ինչի համար է համայնքի ղեկավարին պարգեւատրում: Նինա Թադեւոսյանն ասաց, որ թեեւ ավագանին իր որոշումները «չի մանրամասնում», սակայն համայնքի ղեկավարը պարգեւատրվել է «լավ աշխատանքի համար»:

Անդրադառնալով ձեռք բերված արդյունքներին Վ. Կարապետյանն ասաց, որ այս պահի դրությամբ հողի հարկը 100%-ով հավաքագրել են` մոտ 7 մլն 354 հազար դրամ, շենք-շինությունների գույքահարկը նախատեսվել է 700 հազ դրամ եւ կատարել են 130%-ով: Հավաստիացնում են, որ մինչեւ դեկտեմբերի վերջ 2 մլն 800 հազար դրամն էլ ավտոմեքենաների գույքահարկը կկատարեն: Փոխարենը նույնիսկ 50%-ով չեն կատարել տեղական տուրքերի ու վճարների հավաքագրումը:

Ընդհանուր առմամբ 403 հազ դրամ է կազմում տեղական տուրքը, որից գանձել են ընդամենը 114 հազ. 200 դրամ: Նինա Թադեւոսյանի խոսքերով` գյուղի տարածքում բենզինի վաճառքի թույլտվության գումարը կազմում է 170 հազ դրամ: Գյուղում բենզին վաճառում է միայն ԱԺ պատգամավոր Հրանտ Գրիգորյանին պատկանող ընկերությունը, սակայն նա էլ մինչ օրս գումարը չի փոխանցել: Հրանտ Գրիգորյանի հարցում մտահոգություններ չունեն, ասում են, որ նա մինչեւ տարեվերջ պարտականությունները կկատարի, սակայն նույն լավատեսությունը չունեն խանութների հարցում: «Տեղական տուրքերի համար հիշեցումներ ենք ուղարկել: Խանութի տերը պարտավորություն չի վերցնում իր վրա, երեւի այդպես հարմար է իրեն, բայց մենք անընդհատ հիշեցումներն ուղարկում ենք, որ մինչեւ տարեվերջ ապահովենք հավաքագրումը»,- ասում է Նինա Թադեւոսյանը:

Ծաղկունքում նվազել է հող մշակողների թիվը: Ոմանք հնարավորություն չունեն, մի մասն էլ արտերկիր է մեկնել: Վերջին հաշվարկներով գյուղից 129 մարդ է բացակայում: Ծաղկունքում այս տարվա միակ ուրախությունը ծնունդների աճն է: