Այսօր Հայաստանի վեց մարզերի 375 համայնքներում տեղական ինքնակառավարման մարմինների` համայնքի ղեկավարի և ավագանու անդամների ընտրություններ են։

292 համայնքներ ընտրելու են համայնքի ղեկավար։ Ինչպես արդեն հայտնել էինք, համայնքի ղեկավարի պաշտոնի համար թեկնածություն է առաջադրել 523 թեկնածու։

292 համայքներից գրեթե կեսում՝ 140-ում, համայնքի ղեկավարների միջև մրցակցությունը բացակայելու է՝ հաշվի առնելով առաջադրված մեկ թեկնածուի առկայությունը։

Մեկ թեկնածու առաջադրած 140 համայնքներից 137-ում համայնքի ղեկավարի պաշտոնի համար կրկին թեկնածություն են առաջադրել գործող համայնքապետերը։

140 համայնքներում առաջադրված համայնքապետերից 89-ը Հայաստանի հանրապետական կուսակցության անդամներ են, այնուհետ, ըստ գրանցումների, անկուսակցականներ են, իսկ թեկնածուների կուսակցական պատկանելիության տվյալները ներկայացված են գծապատկերում:

Հայաստանի հանրապետական կուսակցությունը նաև գլխավորում է այդ թեկնածուների առաջադրումների ցուցանիշներով. 140 թեկնածուներից 100-ին ՀՀԿ-ն է առաջադրել, հաջորդիվ մեծ քանակ են կազմում ինքնաառաջադրումները։ Թեկնածուների առաջադրումների առավել մանրամասն տվյալներին կարող են ծանոթանալ ստորին գծապատկերում։