![](/static/articles/71/71/l-MPHshNZPmI.jpg)
«Հայացք». Կենտրոն վարչական շրջանի ղեկավարը համամիտ չէ նախկին քաղաքապետի հետ
Բնապահպանները շարունակում են ահազանգել, որ Երևանի կենտրոնի կանաչ տարածքները պատշաճ չեն պահպանում, ոմանց «թեթև» ձեռքով ոչնչացվում են: Որպես համայնքի ղեկավար` ի՞նչ խնդիր եք տեսնում այստեղ:
Ես կարծում եմ` վաղուց արդեն չկա այն խնդիրը, որ քաղաքի կենտրոնում կանաչ գոտիներ են ոչնչացվում: Ինչ որ կա, մենք պահպանում ենք, ավելացնում ենք նոր կանաչ տարածքներ: Ես չգիտեմ` գուցե մի քանի տարի առաջվա խնդիր եք բարձրացնում, բայց հիմա այդ խնդիրը չկա:
Ասում եք` խնդիր չկա, բայց օրերս դարձյալ ահազանգ ստացվեց. Տերյան 62 հասցեում առողջ ծառեր հատվեցին: Դա՞ էլ կժխտեք:
- Տերյան փողոցում հիմա մենք տեսնում ենք, որ ծառերը շարժվում են, արմատային համակարգը թուլանում է, այդպես էլ է լինում: Համապատասխան մասնագետների եզրակացությունից հետո, բնականաբար, այդ ծառերը պետք է տեղափոխվեն, ավելի շուտ` ոչ թե տեղափոխվեն, այլ կտրվեն: Իհարկե, դրանց տեղում պետք է տնկել նոր ծառեր: Եթե համեմատենք նախորդ տարիների հետ, կտեսնենք, որ հենց Կենտրոնում ինչքան ծաղկապատ ու գազոնային տարածքներ են ավելացել: Չգիտեմ` ինչ ցանկություն պետք է ունենաք, որ չտեսնեք դա:
Կենտրոնում շարունակում է չլուծվող խնդիր մնալ նաև աղբահանությունը: Ի՞նչն է խանգարում նորմալ աղբահանության իրականացմանը:
- Երբ որ մարդկանց մեջ վերանա փնթիությունը, իսկ ծառայություններն ավելի ուշադիր աշխատեն, այդ խնդիրը չի լինի: Բայց մենք աշխատում ենք, թեև բոլորը չեն հետևում մաքրությանը: Ո՞վ է կեղտոտում. բնակչությունը, չէ՞: Եթե աղբամանը դրված է, բայց մարդը գալիս է և աղբը գցում ոչ թե աղբամանի մեջ, այլ կողքը, ո՞վ է մեղավոր: Մեկ-մեկ լրատվամիջոցները նկարում են այն աղբամանները, որոնք լիքն են: Ես կուզեի նրանց հարցնել` իրենց տան աղբի դույլը չի՞ լցվում, թե իրենք կեսից տանում թափում են: Ուրիշ բան է, եթե աղբամանը լցված մնա մի քանի օր: Բայց եթե աղբամանը կիսատ է, իսկ մարդիկ պահանջում են, որ աղբը թափվի, դա նշանակում է` այդ ծառայության համար միլիարդներ պետք է ծախսել, որ չկա:
Պարոն Գյանջումյան, Երևանի նախկին քաղաքապետի` կրպակների ապամոնտաժման որոշումը մեծ աղմուկ բարձրացրեց: Գործընթացն սկսվեց հենց Կենտրոն համայնքից: Կրպակատերերը Ձեզ` որպես համայնքի ղեկավարի, դիմե՞լ են իրենց խնդիրներով:
- Դա միայն Կենտրոնին չէր վերաբերում, այլ ամբողջ քաղաքին: Հիմնականում ապամոնտաժել ենք չգործող կրպակները: Իսկ որոնք օրենսդրական դաշտում չեն, դիմել ենք, որ օրինականացնեն: Ով հասկացել է, տեղափոխել է իր կրպակը, իսկ ով չի ընդունել, օրենքի համաձայն` դատական կարգով կփորձենք տեղափոխել կրպակները: Կա՛մ պետք է օրինականացվի, կա՛մ... Այսօր տեսնում ենք, որ քաղաքն ավելի մաքուր է դարձել, որ անճաշակ ու պրոբլեմային կրպակաշարերը վերացել են:
Բայց նաև հայտարարվեց, որ Աբովյան փողոցի մայթերի` հարուստներին պատկանող խանութներն էլ կքանդվեն: Ինչո՞ւ չեն քանդվում:
- Այդ բոլորը ծրագրում կա: Ե՛վ քաղաքի գլխավոր ճարտարապետը, և՛ համապատասխան ծառայություններն աշխատում են այդ ուղղությամբ:
Նախկին քաղաքապետը համոզված էր, որ «աղքատ մարդը Երևանի կենտրոնում կրպակ չի ունենա»: Դուք է՞լ եք այդպես կարծում. Կենտրոնում բոլորը հարո՞ւստ են:
- Չի կարելի ամեն ինչ ընդհանրացնել և բոլորին մի արշինով չափել: Միանշանակ, չի կարելի 100 տոկոսանոց կարծիք կազմել այդ մասին: Կա և՛ այսպես, և՛ այնպես:
Ամեն դեպքում, այդ հարցն ի շահ բնակիչների պետք է լուծել: Քաղաքը գեղեցիկ պահելը լավ է, բայց պետք է մտածել, որպեսզի սոցիալական նոր խնդիրներ չառաջանան:
Մեկնաբանություններ (1)
Մեկնաբանել