Կառավարության երեկվա նիստում իր զուսպ ու հանդարտ բնավորությամբ մշտապես աչքի ընկնող էկոնոմիկայի նախարար Տիգրան Դավթյանը բարկացավ Պետեկամուտների կոմիտեի նախագահի տեղակալ Արմեն Ալավերդյանի վրա:

ՊԵԿ նախագահը ներկայացնում էր «Բնապահպանական ծրագրերի կենտրոն» ՊՈԱԿ-ի կողմից Հայաստան ներմուծվող մեքենա սարքավորումների նկատմամբ կիրառված «ժամանակավոր մաքսային ներմուծում» ռեժիմի ժամկետը երկարաձգելու թույլտվություն ստանալու վերաբերյալ հարցը: Տեղից «մեջ մտավ» Տիգրան Դավթյանը, թե. «Պարոն վարչապետ, առանց էկոնոմիկայի նախարարության կարծիքի՝ ընդունելի չէ: Ժամանակավոր ներմուծումներում պետք է էկոնոմիկայի նախարարության կարծիքը լինի»:

Արմեն Ալավերդյանը շտապեց տեղեկացնել, որ նախագիծը հավանության է արժանացել ֆինանսատնտեսական կոմիտեում: «Ներկայացրել է բնապահպանության նախարարը, ներկա է եղել էկոնոմիկայի նախարարի առաջին տեղակալը, որը տվել է 100 տոկոս համաձայնություն: Հիմա կառավարության նիստում նորից հնչեցնել, կարծում եմ...»: Արմեն Ալավերդյանը չհասցրեց ավարտել խոսքը, երբ Տիգրան Դավթյանը տեղից բարկացած ձայնով ասաց. «Կառավարության կարգի համաձայն, պետք է ներկայացներ էկոնոմիկայի նախարարությունը, երկրորդ՝ էկոնոմիկայի նախարարության կարծիքը պարտադիր է, վերջ»:

Այս իրավիճակից շփոթված Արմեն Ալավերդյանը մոռացավ ներկայացնել իր հաջորդ հարցը: Քիչ անց վարչապետը նրան հիշեցրեց, որ այլ հարց էլ ունի զեկուցելու: «Համեցեք, պարոն Ալավերդյան: Պարոն Դավթյանն այնպես բարկացավ՝ մոռացաք հաջորդ հարցը զեկուցել»,- ասաց վարչապետը:

Ռ. Հովհաննիսյան