Այս տարվա հունվար-սեպտեմբերին Հայաստանի 1000 խոշոր հարկատուները պետբյուջե են վճարել շուրջ 525 մլրդ դրամ, որը 9.5 մլրդ դրամով կամ մոտ 1.9%-ով գերազանցում է 2015-ի նույն ամիսներին գրանցված ցուցանիշը։ Այս մասին են վկայում ՀՀ պետական եկամուտների կոմիտեի հրապարակած տվյալները։

Հայաստանի խոշորագույն հարկատուն շարունակում է մնալ «Գազպրոմ Արմենիա» ընկերությունը, որն այս տարվա առաջին 9 ամսիներին վճարել է 29.8 մլրդ դրամի հարկ։ Նախորդ տարվա նույն ամիսների համեմատ «Գազպրոմ Արմենիա»-ի վճարած հարկերի ծավալը նվազել է մոտ 1.2 մլրդ դրամով կամ 3.9%-ով։

Այս տարի հանրապետության երկրորդ խոշորագույն հարկատուի դիրքերում ամրապնդվել է «Գրանդ Տոբակո հայ-կանադական ՀՁ» ընկերությունն ու  8-րդ հորիզոնականից բարձրացել է 2-րդ հորիզոնական։

Խոշորների եռյակը եզրափակում է «Որոտանի հիդրոէլեկտրակայանների համալիր»-ը, որը նախորդ տարվա նույն ամիսներին ևս նույն հորիզոնականում էր։

Չորրորդ տեղում է «Հայաստանի էլեկտրական ցանցեր»-ը։ Ընկերությունը  1 հորիզոնակով առաջընթաց է գրանցել։ Իսկ հնգյակի վերջին հորիզոնականում «Ալեքս Գրիգ» ընկերությունն է։ Չնայած հարկերի նվազմանը՝ ընկերությունը խոշոր հարկատուների ցանկում 1 հորիզոնականով բարելավել է դիրքը։

Վեցերորդ տեղում «Թեղուտ»-ն է, որը ևս շարունակել է դիրքերի բարելավումը խոշորների ցանկում՝ բարձրանալով 12  հորիզոնականով։ Հաջորդում է «Ղ-Տելեկոմ»-ը, որը դիրքը զիջել է 3  հորիզոնականով։ Իսկ ութերորդ տեղում «ՍիՓիԷս Օիլ Քորփորեյշ»-ն է։ Ընկերությունը 2 հորիզոնականով առաջընթաց է գրանցել։

Մյուսը «Ֆլեշ» ընկերությունն է, որի դիրքի փոփոխություն չի գրանցվել։ Եվ վերջապես, տասնյակը եզրափակում է «Արմենիա Տելեֆոն Կոմպանի»-ն, որը ևս նվազեցրել է հարկերն ու 7-րդ հորիզոնականից իջել 10-րդ հորիզոնական։

Ընդհանուր առմամբ, այս տարվա հունվար-սեպտեմբերին Հայաստանի 10 խոշորագույն հարկատուներից 6-ը նվազեցրել են հարկերի ծավալը նախորդ տարվա նույն ամիսների համեմատ։ Նրանց շարքում ամենամեծ անկումը գրանցել են հեռահաղորդակցության ոլորտում գործող «Ղ-Տելեկոմ»-ն ու «Արմենիա Տելեֆոն Կոմպանի»-ն։ Իսկ 4-ը աճ են գրանցել: Նրանց շարքում էլ առավել զգալի է «Թեղուտ»-ի և «Գրանդ Տոբակո»-ի աճը։

Խոշոր հարկատուների առաջին 10-յակի վճարած հարկերի ծավալներն ու դրանց փոփոխությունները մանրամասն ներկացված են ինֆոգրաֆիկայում։

Նշենք, որ 2015-ի հունվար-սեպտեմբերի տվյալներով առաջին 10-յակում էր նաև «Զանգեզուրի պղնձամոլիբդենային կոմբինատ»-ը։ Ավելին՝ այն հանրապետության երկրորդ խոշոր հարկատուն էր։ Նախորդ տարվա առաջին 9 ամիսներին ընկերությունը պետբյուջե է վճարել 19 մլրդ դրամ, իսկ այս տարվա նույն ժամանակահատվածում՝ 5.2 մլրդ դրամ (17-րդ տեղ)։

Եթե համեմատում ենք 2015-ի հունվար-սեպտեմբերի  առաջին 10-յակի հետ, ապա՝ ընկերությունների կազմում փոփոխություններ են գրանցել միայն «Թեղուտ»-ը, որն արդեն ներառվել է 10-յակում և «Զանգեզուրի պղնձամոլիբդենային կոմբինատ»-ը, որը լքել է 10-յակը։ Մնացած ընկերությունները և նախորդ տարի, և այս տարի 10-յակում են՝ միմյանց զիջելով ու գրավելով 1-10-րդ հորիզոնականները։

Այս տարվա հունվար-սեպտեմբերին խոշոր հարկատուների երկրորդ 10-յակն ունի հետևյալ դասավորությունը.

Խոշոր հարկատուների ցանկին անդրադառնալու առիթներ դեռ կունենանք։