«Սասնա ծռեր» խմբի անդամ Արմեն Բիլյանը ևս երկու ամիս կմնա կալանքի տակ։

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը կրկին բավարարել է քննիչի միջնորդությունը Արմեն Բիլյանի կալանավորման ժամկետի երկարացման վերաբերյալ։ Դատարանը նաև մերժել է Բիլյանի պաշտպանների՝ գրավի դիմաց ազատ արձակելու միջնորդությունը։

Փաստաբան Արմինե Ֆանյանը ասում է, որ ինչպես առաջին ատյանի դեպքում, այսօր ևս նույն պատճառաբանություններով է կալանքի ժամկետը երկարացվել, մասնավորապես նշվել է, որ Արմեն Բիլյանը, ազատության մեջ մնալով, կխոչընդոտի գործի քննությանը, փախուստի կդիմի։ Սակայն այս անգամ, փաստաբանի դիտարկմամբ՝ միջնորդության բավարարման հիմքում նաև մեծ դեր է խաղացել այն հանգամանքը, որ նրան առաջադրված մեղադրանքը խստացվել է։

«Բիլյանը դատարանում հայտարարել է, որ առաջադրված մեղադրանքը չի ընդունում։ Այս պահին նրան առաջադրված սպանության մեղադրանքն է աբսուրդային։ Այս կալանքի ժամկետների երկարացման մասով, կարծում եմ, խոսելն անգամ ավելորդ է, քանի որ բոլորիս էլ հայտնի է, որ կալանավորման ժամկետները, միևնույնն է, երկարացվելու են»,- նշում է փաստաբանը։

Այս պահին Արմեն Բիլյանին նաև մեղադրանք է առաջադրվել ՀՀ ՔՕ 104-րդ հոդվածի 2-րդ մասի 1-ին, 2-րդ, 3-րդ և 11-րդ կետերով (սպանություն) և 238 հոդվածի 4-րդ մասով։ Մասնավորապես՝ նա մեղադրվում է ոստիկանության աշխատակից Գագիկ Մկրտչյանի սպանության մեջ։

Արմինե Ֆանյանը դեռևս իր պաշտպանյալին առաջադրված նոր մեղադրանքի գործին ծանոթ չէ, սակայն պաշտպանական կողմի տեղեկություններով՝ մեղադրանքի առաջադրման հիմքում մեկ վկայի ցուցմունք է հանդիսացել, այլ փաստական տվյալ փաստաբանը դեռ չունի։

Հիշեցնենք, որ Բիլյանին այժմ առաջադրված են չորս մեղադրանքներ. նա մեղադրվում է քրեական օրենսգրքի 218 հոդվածի 3-րդ մասի 1-ին կետով (պատանդ վերցնելը) և 235 հոդվածի 3-րդ մասով (ապօրինի զենք-զինամթերք ձեռք բերելը, իրացնելը, պահելը), նաև վերջին օրերին ավելացված՝ 104-րդ հոդվածի 2-րդմասի 1-ին, 2-րդ, 3-րդ և 11-րդկետերն (սպանություն) ու 238 հոդվածի 4-րդ մասը։