Նոյեմբերի սկզբին Մխիթար Մխիթարյանը տեղեկացել է, որ ունի չմուծած տույժ, որի պատճառով հարուցվել է տուգանքի բռնագանձման վարույթ և դատական ակտերի հարկադիր կատարման(ԴԱՀԿ) ծառայությունը արգելանք է դրել նրան պատկանող գույքի և դրամական հաշիվների վրա։ Արդյունքում՝ Մ. Մխիթարյանը գրեթե քսան օր է` արգելանքի պատճառով չի կարողանում գործարքներ կատարել։

Մխիթարը մարտ կամ ապրիլ ամսին (հստակ տեղյակ չէ՝ ծանուցագրին չծանոթանալու պատճառով) ճանապարհատրանսպորտային խախտում է կատարել՝ արձանագրելով 4,500 դրամի չափ տուգանք, սակայն ծանուցագիրը ստացել է, երբ Հայաստանում չի եղել, որի պատճառով չի տեղեկացել կատարված տուգանքի մասին։

Այնուհետ տուգանքի այդ  ծանուցագիրը տեղադրվել է azdarar.am կայքում: Դրանից անմիջապես հետո, ըստ Մխիթարյանի, ճանապարհային ոստիկանությունը դիմել է ԴԱՀԿ՝ բռնագանձման վարույթ սկսելու պահանջով։ Մ. Մխիթարյանն ասում է, որ անգամ տեղյակ չէ, թե ինչ խախտում է կատարել: Նա այդ մեքենան վաճառել է և «մուտք» չունի police.am կայք՝ խախտումին ծանոթանալու համար։

«Հիմա` մի քանի ամիս անց, ես տեղեկացել եմ, որ տուգանված եմ եղել, տույժ է եկել  ու կալանք կիրառելու վարույթ է սկսվել։ Ես գիտեմ, որ կա որոշում, որ azdarar.am կայքում տեղադրելուց որոշ ժամանակ անց պետք է կրկին գրավոր կերպով ծանուցվեի, նոր ինձ պատկանող գույքի և դրամական հաշիվների վրա արգելանք դրվեր։ Բայց այդպիսի ծանուցում էլ ես չեմ ստացել։ Այսինքն՝ բոլորովի անտեղյակ եմ եղել. կամ պետք է գուշակեի, որ կարող է իմ նկատմամբ վարույթ սկսած լինեին, մտնեի azdarar.am ստուգեի՝ արդյո՞ք  կալանքի որևէ որոշում իմ նկատմամբ կիրառվել է, թե՞ ոչ»,- ասում է նա։

Մխիթարը երեկ զրուցել է բռնագանձման վարույթ սկսելու և արգելանք կիրառելու որոշում կայացնող ԴԱՀԿ աշխատակից Դավիթ Վարդապետյանի հետ, ում տեղեկացրել է, որ տուգանքի ծանուցագիրը չի ստացել Հայաստանից բացակայելու պատճառով։

Մխիթարյանը մեզ է ուղարկել անձնագրի` այդ օրերին Հայաստանից ելքը հաստատող էջի պատճենը

Սակայն Վարդապետյանը պարզաբանել է, որ ճանապարհային ոստիկանությունն է դիմել իրենց, իրենք էլ դրա հիման վրա վարույթ են սկսել։ Հարցին՝ արդյո՞ք ՃՈ-ն կամ ԴԱՀԿ-ը վարույթ սկսելուց առաջ չպետք է կրկին ծանուցագրով տեղեկացնեին, նոր կալանք կիրառելու որոշում կայացնեին, Մխիթարի փոխանցմամբ, ԴԱՀԿ-ի աշխատակիցը պատասխանել է. «Ներեցեք, բայց դա իմ խնդիրը չէ»։

Նաև կապ է հաստատել ՃՈ-ի հետ՝ կրկին հայտնելով, որ տուգանքի ծանուցագիր չի ստացել, որտեղից նրան հայտնել են՝ տեղյակ են, որ ակտը չի ստացել: «Այսինքն՝ տեղյակ են, որ ծանուցագիր չեմ ստացել, սակայն դիմել են ԴԱՀԿ՝ առանց այդ հանգամանքը հաշվի առնելու»,-ասում է նա։