Իտալական GVM հոլդինգի փոխնախագահ Բրունո Բիաջիի և կազմակերպության բիզնեսի միջազգային զարգացման գծով ներկայացուցիչ Լուկա Վեջետիի հետ հանդիպման ընթացքում Հայաստանի առողջապահության նախարար Լևոն Ալթունյանը քննարկել է համագործակցության հնարավորությունները առողջապահության ոլորտում։

Առողջապահության նախարարությունը հայտնում է, որ տարբեր ուղղություններով բիզնես ծրագրեր իրականացնող կազմակերպությունն առողջապահության ոլորտում ճանաչված է հիմնականում Իտալիայում և այլ երկրներում` Ֆրանսիայում, Լեհաստանում, Ալբանիայում, Ռուսաստանում գործող մոտ 40 կլինիկաներում բարձր մակարդակի մասնագիտացված ծառայություններ ապահովելով։ Հիվանդանոցներ կառուցող և նորարարական մոդելով կառավարող Հոլդինգն առավել մասնագիտացված է սրտանոթային ախտաբանության, օրթոպեդիայի և նյարդավիրաբուժության, ինչպես նաև մասնագետների պատրաստման ու վերապատրաստման ոլորտներում։

Լևոն Ալթունյանն իր հյուրերին համառոտ ներկայացրել է Հայաստանի առողջապահական համակարգում իրականացվող ծրագրերն ու խնդիրները` շեշտադրելով այն ուղղությունները, որոնց շրջանակում հնարավոր կլինի համագործակցել հոլդինգի հետ։ Նախարարը մասնավորապես կարևորել է համագործակցությունը ինչպես սրտաբանության, ուռուցքաբանության և այլ ոլորտներում, այնպես էլ`  միջազգային մենեջմենթի միջոցով արդիականացված սահմանամերձ հիվանդանոցներումև ՀՀ ԱՆ «Պրոֆ.Ռ.Յոլյանի անվան արյունաբանական կենտրոնում» այլ երկրներից հիվանդներ ներգրավելու գործում։ 

Քննարկվել են իտալական հոլդինգի հետ առանձին որորտներում համագործակցության տարբեր ձևաչափեր։ Պայմանավորվածություն է ձեռք բերվել առաջիկա հանդիպման ժամանակ առավել հստակեցնել համագործակցության եզրերը` հաշվի առնելով Հայաստանի կարիքները և GVM հոլդինգի ուղղվածություններն ու հնարավորությունները։