Ամալյա Մարգարյան

Վերաքննիչ դատարանը՝ նախագահությամբ Ա. Խաչատրյանի, մերժեց ցմահ դատապարտյալ Ստեփան Գրիգորյանի իրավունքների խախտումը վերացնելեու մասին վերաքննիչբողոքը։

 Դատական նիստի սկզբին դատարան ներկայացվեցին Ստեփան Գրիգորյանի քրեական գործերի 3 հատորները, այնուհետև դատարանը, 1 ժամ ընդմիջում հայտարարելով, գնաց խորհրդակցական սենյակ։

Ստեփան Գրիգորյանի պաշտպան Ռոբերտ Ռևազյանը լրագրողների հետ զրույցում նշեց, որ «Արմավիր» ՔԿՀ-ը, որը մերժել էր ցմահ ազատազրկվածին տրամադրել վաղաժամկետ պայմանական ազատում, պատճառաբանության մեջ նշել է, որ ամբաստանյալը կարճ ժամանակ է, ինչ գտնվում է հիմնարկում, ուստի հնարավոր չէ լիարժեք բնութագրել դատապարտյալին. «Առաջին ատյանի դատարանն, իմ կարծիքով, պետք է ուղղակի քննարկեր այդ հիմնարկի որոշման օրինականությունը, այն հիմքը՝ արդյո՞ք կարճ ժամանակահատվածը պետք է բավարար հիմք հանդիսանար հիմնարկի  համար՝ հետաձգելու վաղաժամկետ ազատելու միջնորդությունը, թե ոչ։ Իմ կարծիքով, դա հիմք չպետք է հանդիսանար, եթե անձը կարճ ժամանակահատվածում է գտնվել, չպետք է բացասական անդրադարձ կատարեր դատապարտյալի վրա»։

Ըստ փաստաբանի՝ դատարանը նշել է նաև, որ դատապարտյալը չի ուղղվել, բնութագիրը դրական չէ՝ չնայած ուղղման ճանապարհին է, բայց դեռ ուղղվելու անհրաժեշտություն կա։

«Դատարանը կրկնօրինակել է հիմնարկի գործառույթը, ինքը գնահատել է կոնկրետ վարքագիծը՝ միաժամանակ չուսումնասիրելով գործը»,-ավելացրեց փաստաբանը։

Նա նշեց նաև, որ եթե կան «Արմավիր» ՔԿՀ-ի կողմից արված ուղղման ծրագրեր, պետք է ներկայացվեին, բայց չի ներկայացվել. «Դատարանում դա քննության առարկա չի դարձրել, և դատարանն իրավունք չունի քննության առարկա չդարձված փաստերի հիման վրա եզրակություններ անել, այն դեպքում, երբ մենք այդ հարցը բարձրացրել ենք»։

Անդրադառնալով 20 տարվա շեմը հատած և վաղաժամկետ պայմանական ազատում չստացած մոտ 20 դատապարտյալներին՝ փաստաբան Ռևազյանը նշեց.

Մի քանի բանի մասին կարող է խոսել՝ ուղղման գործընթացը ճիշտ չի իրականացվում, տարիների ընթացքում որևէ մեկը չուղղվե՞ց, թե՞ պետական քաղաքականությունն է այդպիսին, որ ցմահներին չպետք է վաղաժամկետ ազատ արձակել։ Պետությունն էլ ունի պարտականություններ, որ ուղղելու համար որևէ աշխատանք տանի, եթե չկա, ուրեմն ձախողել ենք, սա միայն անձի խնդիրը չի։ Այս 20-ից մեկը չկա՞ր: Սրանով կարող ենք ասել, որ օրենսդրորեն ամրագրված այդ կետն ուղղակի ձևական բնույթ ունի, իրականում չկա»։

Այս տարվա մայիսին լրացել է Ստեփան Գրիգորյանի պատժի կրման 20 տարին, մայիսի 29-ին «Նուբարաշեն» ՔԿՀ-ի վարչական հանձնաժողովը քննարկել է հարցը, իսկ հունիսի 2-ին նույն դատապարտյալը ստացել է պատասխան, ըստ որի՝ իրեն ծանոթացրել են առանց որևէ հիմնավորման հարցը մեկ տարով հետաձգելու մասին տեղեկանքին։ Դատապարտյալը դիմում է ներկայացրել Առաջին ատյանի դատարան, սակայն դիմումը մերժվել է ։

Հիշեցնենք, որ Ստեփան Գրիգորյանը մեղադրվում է սպանության գործով որպես մասնակից և 1997-ին դատապարտվել մահապատժի։