Տեսանյութեր
Լուսանկարներ
Հայաստանի օմբուդսմենը Ժնևում հանդիպել է ՄԱԿ-ի Մարդու իրավունքների գերագույն հանձնակատարին
Հայաստանի մարդու իրավունքների պաշտպան Արման Թաթոյանը այսօր Ժնևում հանդիպել է ՄԱԿ-ի Մարդու իրավունքների գերագույն հանձնակատար Զեիդ Ռաադ Ալ Հուսեյնին:
Մարդու իրավունքների պաշտպանի գրասենյակը հայտնում է, որ հանդիպման ընթացքում Արման Թաթոյանը գերագույն հանձնակատարին է ներկայացրել այս տարվա ապրիլի սկզբին ադրբեջանական ռազմական ագրեսիայի ընթացքում Արցախի քաղաքացիական բնակչության նկատմամբ ադրբեջանական զինված ուժերի կատարած՝ մարդու իրավունքների հիմնարար խախտումները՝ դաժանությունների կոնկրետ օրինակներով:
Պաշտպանը գերագույն հանձնակատարին է փոխանցել Արցախի մարդու իրավունքների պաշտպանի հրապարակած՝ այդ դեպքերը վերլուծող զեկույցները, ինչպես նաև արգելված զինատեսակների և քաղաքացիական բնակավայրերի նկատմամբ թիրախավորված հարձակումների վերաբերյալ տվյալները՝ կոնկրետ փաստերով:
Մարդու իրավունքների խորհրդի 33-րդ նիստի ընթացքում գերագույն հանձնակատարն իր բացման խոսքում նշել էր, որ Լեռնային Ղարաբաղ այցելելու հնարավորություն չունի և այդ իսկ պատճառով չի տիրապետում այնտեղ մարդու իրավունքների վիճակին:
Այս կապակցությամբ պաշտպանը հանձնակատարին է փոխանցել ԼՂ մարդու իրավունքների պաշտպանի՝ Արցախ այցելելու հրավերը:
«Արման Թաթոյանն առանձնապես ընդգծել է Արցախի մարդու իրավունքների պաշտպանի մասնակցության կարևորությունը միջազգային մակարդակի հանդիպումներին, քանի որ դա կապ չունի որևէ քաղաքական հարցի հետ և ունի բացառապես իրավապաշտպան և կանխարգելիչ նպատակներ:
Հանդիպման ընթացքում ներկայացվել են նաև «Մարդու իրավունքների պաշտպանի մասին» ՀՀ սահմանադրական օրենքի նախագծի առանցքային կարգավորումները և կարևորվել է գերագույն հանձնակատարի գրասենյակի կարծիքը դրա վերաբերյալ: Շեշտադրվել է սահմանադրական փոփոխությունների արդյունքում Մարդու իրավունքների պաշտպանին ընձեռնված նոր լիազորությունը՝ հետևելու մասնավոր կազմակերպությունների կողմից մարդու իրավունքների և ազատությունների պահպանմանը, նպաստել այդ կազմակերպությունների կողմից խախտված իրավունքների և ազատությունների վերականգնմանը:
Հանդիպման ավարտին գերագույն հանձնակատարը առաջարկել է լինել մշտական կապի մեջ և կարևորել է Հայաստանի մարդու իրավունքների պաշտպանի դերը միջազգային կազմակերպությունների և ՀՀ իշխանությունների հետ կապի հարցերում»,- գրված է ՄԻՊ գրասենյակի հաղորդագրության մեջ:
Մեկնաբանել