Կառավարության նիստի մեկնարկին վարչապետ Կարեն Կարապետյանը կրկին հանձնարարականեր տվեց նախարարությունների ղեկավարներին։

Մասնավորապես՝ պետական մարմինների արտաբյուջետային միջոցների գոյացման, դրանց նպատակային ծախսման թափանցիկությունը և հաշվետվողականությունը ապահովելու նպատակով արդարադատության նախարար Արփինե Հովհաննիսյանին Կարապետյանը հանձնարարեց մինչև 2016 թվականի դեկտեմբերի 9-ը կառավարության աշխատակազմ ներկայացնել արդարադատության նախարարության դատական ակտերի հարկադիր կատարման ծառայության նյութական խրախուսման և համակարգի զարգացման արտաբյուջետային միջոցների վերաբերյալ կառավարության համապատասխան որոշման նախագիծ։

Բացի դրանից, Կարապետյանը գլխավոր դատախազ Արթուր Դավթյանին հորդորեց ուշադրություն դարձնել խաղաղ պայմաններում զոհված զինծառայողների քրեական գործերի քննության հարցին։ Վարչապետի փոխանցմամբ՝ իրեն և կառավարության աշխատակազմին են դիմել այդ զինծառայողների ծնողները, որոնց բարձրաձայնած խնդիրները վերաբերում են ստույգ քրեական գործերի քննությանը, որոնց մասով հսկողությունը իրականացնում է դատախազությունը։

Կարապետյանը դատախազին խոստացավ իրենց ուղղված գրությունները, որտեղ նաև նշված են դիմած ծնողների կոնտակտային տվյալները, փոխանցել դատախազությանը՝ հանդիպում կազմակերպելու համար։