![](/static/articles/73/41/l-w48T4Mb7eF.jpg)
Էջմիածինը՝ ՅՈւՆԵՍԿՕ-ի համաժողովում
Պորտուգալիայի Սինտրա քաղաքում անցկացվել է ՅՈւՆԵՍԿՕ-ի «Համաշխարհային ժառանգության քաղաքներ» կազմակերպության 11-րդ համաշխարհային համաժողովը, որին Հայաստանից մասնակցում էր Էջմիածնի պատվիրակությունը՝ քաղաքապետ Կարեն Գրիգորյանի գլխավորությամբ:
Ընկերակցությանն անդամակցում է աշխարհի ավելի քան 200 քաղաք: Էջմիածինն ընկերակցությանը անդամակցում է 2007 թվականից՝ Ինֆորմատիզացիայի միջազգային ակադեմիայի նախագահ, կանադաբնակ Ազատ Վարդանյանի երաշխավորությամբ:
Ինչպես «Հետքին» տեղեկացնում են Էջմիածնի քաղաքապետարանի լրատվական բաժնից, Ա. Վարդանյանը Սինտրայի համաժողովում ներկայացրել է Էջմիածնի պատվիրակությանը, որի կազմում, բացի քաղաքապետից, եղել է նաև համայնքի ավագանու անդամ Տիգրան Կամավոսյանը:
11-րդ համաժողովի հիմնական թեման եղել է «Համաշխարհային ժառանգության քաղաքները և կլիմայի փոփոխությունները»: Այդ ընթացքում Էջմիածնի քաղաքապետը հանդիպումներ է ունեցել կազմակերպության ղեկավարության, ՅՈւՆԵՍԿՕ-ի ներկայացուցիչների, Պորտուգալիայի, Մալազիայի, Հոլանդիայի, Իսպանիայի, Ռուսաստանի, Մեքսիկայի, Լեհաստանի, Արգենտինայի, մի շարք այլ պետությունների տարբեր քաղաքների ղեկավարների հետ:
Հանդիպումների ընթացքում քննարկվել են քաղաքային տնտեսության կառավարման և այլ բնագավառներում համագործակցության հնարավորությունները:
Մեկնաբանել