Այսօր տեղի է ունեցել ԼՂՀ ԱԺ պետական-իրավական հարցերի ու  ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստը: 

Ինչպես տեղեկացնում է Արցախի ԱԺ լրատվական ծառայությունը, նիստի օրակարգում «ԼՂՀ 2017թ. պետական բյուջեի մասին» ԼՂՀ օրենքի նախագծում նախատեսված իշխանության պետական, տեղական ինքնակառավարման, դատական մարմինների և դատախազության ֆինանսավորման հարցերն էին:

ԼՂՀ նախագահի աշխատակազմի և Ազգային ժողովի 2017թ.-ի պետական բյուջեով նախատեսվող ծախսերը ներկայացրել են ԼՂՀ նախագահի աշխատակազմի ղեկավար Մարատ Մուսայելյանը և ԼՂՀ Ազգային ժողովի աշխատակազմի ղեկավար Գարիկ Ժամհարյանը:

Գերագույն դատարանի նախագահ Նարինե Նարիմանյանի ներկայացմաբ  2017թ.-ի պետական բյուջեի օրինագծով դատական համակարգի պահպանման ծախսը կազմել է 558 մլն 195 հազ դրամ, ինչը 2016թ.-ի ճշտված բյուջեի համեմատ աճել է 12մլն 278հազ դրամով:

Գլխավոր դատախազ Արթուր Մոսիյանի ներկայացմամբ, համակարգի 2017թ.-ի ծախսը նախատեսվում է 497մլն 761հազ դրամի չափով, որը 2016թ.-ի համեմատ ավել է 4 մլն 261 հազ  դրամով:

Արդարադատության նախարար Արարատ Դանիելյանի ներկայացմամբ, նախարարության աշխատակազմի 2017թ.-ին նախատեսվող ծախսը կազմում է 337մլն դրամ, աճը նախորդ տարվա համեմատ՝ 1 մլն 895հազ դրամ:

Ընդմիջումից հետո 2017թ. բյուջեի ոլորտային նախագծեր են ներկայացրել  վերահսկիչ պալատի նախագահ Էռնեստ Ավանեսյանը, ԼՂՀ մարդու իրավունքների պաշտպան Ռուբեն Մելիքյանը, քաղաքացիական ծառայության խորհրդի նախագահ Բորիս Առուշանյանը և կենտրոնական ընտրական հանձնաժողովի նախագահ Սրբուհի Արզումանյանը:                               

2017թ. պետական բյուջեի նախագծով վերահսկիչ պալատի պահպանման ծախսը նախատեսվում է 134մլն 947հազ դրամ, որը 2016թ. համեմատ աճել է 843հազ դրամով:

Մարդու իրավունքների պաշտպանի գրասենյակի ծախսերը գալիք տարվա բյուջեով  կկազմեն 41մլն 796 հազար դրամ:

ԼՂՀ քաղաքացիական ծառայության խորհրդի ծախսերը 2017թ.-ին նախատեսվել են 100 մլն 811հազ դրամ, աճը 2016-ի համեմատ կազմում է 4 մլն 118հազ դրամ:

Կենտրոնական ընտրական հանձնաժողովի 2017թ. բյուջեի նախագծով նախատեսվում է 154 մլն 270 հազար դրամի ծախս, 2016 թվականի համեմատ՝ ավելանալով 65 մլն 683 հազ դրամով:

Օրվա երկրորդ կեսին շարունակվել է ԼՂՀ ԱԺ պետական-իրավական հարցերի ու  ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստը:

2017թ. պետական բյուջեի նախագծեր են ներկայացրել Ստեփանակերտի քաղաքապետը և վարչակազմերի ղեկավարները և տեղակալները:

Ստեփանակերտի քաղաքապետարանի պահպանման ծախսը 2017թ. պետական բյուջեով նախատեսվում է 305մլն 661 հազար դրամ: 2017թ. բյուջեով Ասկերանի շրջանի վարչակազմի պահպանման ծախսը  նախատեսվում է 172 մլն 554 հազար դրամ, ինչը 2016թ.-ի համեմատ նվազել է 719 հազար դրամով:

Հադրութի շրջանի վարչակազմի բյուջեն 2017թ.-ին նախատեսվում է 136 մլն 223 հազար դրամ, որը նախորդ տարվա համեմատ 1 մլն 98 հազար դրամով նվազել է: Մարտակերտի շրջանի վարչակազմի պահպանման ծախսը 2017թ.-ի բյուջեով նախատեսվում է 161 մլն 738 հազար, որը ընթացիկ տարվա համեմատ պակաս է 3 մլն 829 հազար դրամով: Մարտունու համայնքային բյուջեն 2017թ.-ին կազմում է 167 մլն 177 հազար դրամ, որը նախորդ տարվա համեմատ նվազել է 2 մլն 831 հազար դրամով:
Քաշաթաղի շրջանի վարչակազմի պահպանման ծախսը 2017թ.-ի բյուջեով նախատեսվում է է 279 մլն 790 հազար, ինչը 2016թ.-ի համեմատ պակաս է 581 հազար դրամով:
Շահումյանի շրջանի վարչակազմի ծախսը 2017թ. բյուջեի նախագծով կկազմի 108 մլն 860 հազար դրամ, ինչը ընթացիկ տարվա համեմատ ավել է 1 մլն 204 հազար դրամով:
Նիստի ընթացքում պատգամավորները զեկուցողներին են առաջադրել հարցեր և առաջարկություններ: