Կառավարության նախաձեռնությամբ այսօր ԱԺ արտահերթ նստաշրջան է գումարվել։ Նիստի օրակարգում ընդգրկվել են գրեթե երեք տասնյակ հարցեր։ Առաջինը քննարկման «դրվեց» Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին օրենքի նախագիծը։

ՀԱԿ խմբակցության պատգամավոր Հրանտ Բագրատյանը, ԱԺ-ում քննարկվող այս օրինագծի վերաբերյալ իր դիտարկումներն էր ցանկանում ներկայացնել, սակայն նրան արգելեցին, քանի որ նիստը նախագահող Հերմինե Նաղդալյանը նշեց, որ այս պահին քննարկվում են նախարարի ներկայացրած փաթեթում նոր օրինագծերի փոփոխություններն ու լրացումները։

Նաղդալյանը հիշեցրեց, որ, ըստ կանոնակարգի, սահամանված է, որ երբ առաջին ընթերցման ռեժիմից հետո օրինագիծը հարստացվում է նոր նախագծերով կամ դրանց վերաբերյալ լրացումներով, փոփոխություններով, այդ նոր կետերը քննարկվում են առաջին ընթերցման ռեժիմով։ Հավելեց, որ երբ ավարտվեն այդ փոփոխությունների քննարկումները, Վիգեն Սարգսյանը կրկին ներկայացնելու է օրինագիծը, և այդ ժամանակ պատգամավորը կարող է ելույթ ունենալ, սակայն չի կարող հարց տալ, քանի որ առաջարկություններ չի ներկայացրել։

Նաղդալյանի այդ դիտարկմանը ՀԱԿ պատգամավորը արձագանքեց հետևյալ կերպ. «Տիկին Նաղդալյան, իմ ինտելեկտը չի հերիքում, որ հասկանամ՝ դուք ինչ եք ասում։ Բայց կամ մի պրոբլեմ, դուք չեք լսում՝ ես ինչ եմ ասում։ Դուք ինձ ընդհատեցիք, թույլ չտվեցիք խոսել։ Նախ ներկայացված է փաթեթով, երկրորդը՝ պարոն նախարար, փոփոխություններն այնքան էական են, որ սա չի կարելի քննարկել որպես երկրորդ ընթերցում։ Նոր բան եք ներկայացրել։ Եվ՜ հինն եմ կարդացել, և՜ նորն եմ կարդացել։ Սա է խնդիրը»,- ասաց Բագրատյանը։