![](/static/articles/73/98/l-pQpIlWI7b2.jpg)
«Հայացք». Է՛լ հայվան, է՛լ պատգամավորական գլխաքանակ, է՛լ անլվա ականջներ` խորհրդարանում
Երեկ հայրենի խորհրդարանի նիստերի դահլիճը մի պահ իսկական քաոսի վերածվեց:
«Ժառանգություն» խմբակցության անդամ Արմեն Մարտիրոսյանը, Արծվիկ Մինասյանի հետ զրուցելիս, չլսեց Սամվել Նիկոյանի՝ հարցի իրավունք ընձեռելու հնարավորությունը, և փոխխոսնակը հայտարարեց, որ Մարտիրոսյանը հրաժարվում է ձայնի իրավունքից, ինչին ընդդիմացավ Մարտիրոսյանը, և լսվեց Նիկոյանի հորդորը. «Ականջներդ լվա այդ դեպքում»:
Երկխոսությունից հետո նիստերի դահլիճում աղմուկ բարձրացավ, և Մարտիրոսյանը հակադարձեց, թե՝ կշարունակի միայն լռությունից հետո:
Այնուհետև տեղի տվեցին Առաքել Մովսիսյանի (Շմայս) նյարդերը: Ըստ Ստեփան Սաֆարյանի՝ Մովսիսյանը, դիմելով Մարտիրոսյանին, ասել է. «Ես չեմ էկել ստեղ, որ քո նման հայվանին լսեմ»: Մարտիրոսյանն էլ թե՝ «Հայվանն ինքդ ես»: Դրանից հետո վիրավորված Շմայսը լքել է դահլիճը:
Անահիտ Բախշյանն էլ նկատեց, որ դահլիճում ներկաները քիչ են, և ասաց. «67 հոգի է դահլիճում նստած, բայց գրանցվել են 82 հոգի»:
Այդ ընթացքում դահլիճից լսվեցին տարբեր կարծիքներ, ինչին Անահիտ Բախշյանն արձագանքեց այսպես.
«Մի՛ բարկացեք, ձեր գլուխները հաշվել եմ՝ 67 հոգի եք, իմն էլ հետն եմ հաշվել, մի՛ նեղացեք»:
Իսկ ԱԺ ապագա փոխխոսնակ Էդ. Շարմազանովն արեց իր դարակազմիկ եզրակացությունը. իբր այս ամենը միտումնավոր է արված, որպեսզի Սամվել Նիկոյանը ԱԺ նախագահ չընտրվի:
Իսկ ո՞վ էր Նիկոյանին խնդրում բաղնիքի քիսաչու հանձնառություն վերցնի ու պատգամավորի ականջը լվանալու առաջարկություն անի:
Էս է մեր խորհրդարանը: Ավելին պահանջել չես կարող:
Մեկնաբանություններ (2)
Մեկնաբանել