![](/static/articles/73/99/l-ividr96TFv.jpg)
«Հայացք». Ես իմ հողակտորը, իմ տնկած ծառն ու ծաղիկն եմ ուզում
«Ես իմ հողակտորը, իմ տնկած ծառն ու ծաղիկն եմ ուզում» պահանջով երեկվանից Երևանի քաղաքապետարանի շենքի այն տարածքում, որտեղով Երևանի քաղաքապետի ծառայողական ավտոմեքենան է ելումուտ անում, հացադուլ է սկսել Քանաքեռ-Զեյթուն վարչական շրջանի բնակիչ Լեյլա Ասատրյանը:
Նա Զաքարիա Սարկավագ 131 շենքի բնակիչ է, զոհված ազատամարտիկի կին և իր պատուհանի տակ 100 քմ հողատարածք ունի, որը, իր խոսքով, փորձում են խլել: «41 տարեկանից ես այդ հողակտորը մշակում եմ, արդեն 18 տարի է: Իմ հողակտորը սեփականաշնորհեք իմ անունով»,- պահանջում է հացադուլ հայտարարած կինը:
Զաքարիա Սարկավագ 131 և հարևան շենքերի արանքում շինարարություն է իրականացվում: Քաղաքապետարանի աշխատակիցներն ու Քանաքեռ-Զեյթուն վարչական շրջանի ղեկավար Արայիկ Քոթանջյանը տիկնոջը հավատացնում են, թե խաղահրապարակ է կառուցվում: Սակայն տարածքի բնակիչներն այլ կարծիքի են. նրանք լսել են, որ տարածքը վաճառվել է մեծահարուստ ոմն զեյթունցի Ռաֆիկի:
Լեյլա Ասատրյանը նշեց, որ իր աչքով է տեսել` տարածքի շինարարական պաստառների վրա գրված է եղել, որ հասարակական օբյեկտ է կառուցվում: «Դա կարող է ատրակցիոն լինել, ասենք, առաջին հարկում բար լինի և այլն»,- նշեց նա` մտահոգվելով, որ գուցե իր հողակտորի տարածքում էլ այդ օբյեկտի համար ավտոկայանատեղի կառուցվի:
«Ես գժություն չեմ անում, անբարոյական չեմ, 25 տարվա իրավաբան եմ, գուցե ես այդ հողամասով եմ ապրում, ինչո՞ւ եք վերցնում»,- հարցադրում էր անում նա:
Քաղաքապետարանի բակում կնոջն ընդունեց քաղաքապետի խորհրդական Գրիգոր Սարիբեկյանը, ով պնդում էր, թե տարածքում խաղահրապարակ է կառուցվում:
«Թաղապետի նախաձեռնությամբ մանկական խաղահրապարակ է կառուցվում 2 բարձրահարկերի կողքին, որն անմիջապես տիկին Լեյլայի հողակտորի կողքին է»,- լրագրողներին ասաց քաղաքապետի խորհրդականը:
«Մի հավատացեք պարոն Սարիբեկյանին, ես էլ եմ ժամանակին հավատացել»,- բացականչում էր հացադուլ հայտարարած կինը:
Նրան զայրացրել է այն, որ հարուստ հարևանին թույլ են տվել սեփականաշնորհել իր հողատարածքը, իսկ իրեն` ոչ. «Օրենքը բոլորի համար չէ՞: Հիմա ինձ պատասխանեք, թե ինչու իմ հարևանին թույլ տվեցիք սեփականաշնորհել իր հողատարածքը, իսկ ինձ` ոչ»:
Լեյլա Աստարյանը նշեց, որ անհայտ մարդիկ արդեն կտրատել և այրել են իր հողատարածքի ծառերը: Նախորդ տարի կնոջն ընդունել է Երևանի փոխքաղաքապետ Տարոն Մարգարյանը, վարչական շրջանի ղեկավարին հանձնարարել, որ կանաչապատեն տարածքը: Սակայն համայնքի ղեկավարի կողմից ոչինչ չի արվել:
«Երեկ Արայիկ Քոթանջյանն ինձ անամոթաբար ասում է` տիկին Լեյլա, ես ձեզ առաջարկեցի կանաչապատել տարածքը, ինչո՞ւ չընդունեցիք իմ առաջարկը: Զարմանալի սուտ, տղամարդն էլ այդքան սուտասան լինի՞»,- նշեց Լ. Ասատրյանը:
Նա չընդունեց քաղաքապետի խորհրդականի այն առաջարկը, թե «բարձրանանք վերև, ճարտարապետների հետ հարցը քննարկենք»: Տեղեկացնելով, որ հարցով դիմել է նաև Գլխավոր դատախազություն` Լեյլա Ասատրյանը նշեց, որ քաղաքապետարանի շենքի մոտ հացադուլ կանի այնքան ժամանակ, մինչև քաղաքապետ Տարոն Մարգարյանն իրեն ընդունի:
Հ.Գ. Երեկ երեկոյան Լեյլա Ասատրյանը դեռ քաղաքապետարանի շենքի մոտ էր: Ըստ նրա` թեև քաղաքապետ Տարոն Մարգարյանն ամբողջ օրը տեղում էր, բայց այդպես էլ չցանկացավ ընդունել իրեն: «Գիշերը մնալու եմ այստեղ, կամ` կսառեմ, կմեռնեմ, կամ` կհաղթեմ»,- ասաց նա: Լեյլա Ասատրյանը նաև տեղեկացրեց, որ երեկ կեսօրին իրեն տարել են ոստիկանական բաժանմունք, համոզել, որ դադարեցնի հացադուլը, հետո բաց են թողել: Հացադուլավոր կնոջ առողջական վիճակն արդեն վատացել է. «Արդեն ճնշումս իջել է, ինձ բժիշկ է պետք: Չգիտեմ ինչ անել»,- գանգատվեց նա:
Հովհ. Վարդանյան
Մեկնաբանել